Облыс спортшыларының жақсы жетістіктері көп-ақ. Қысқы VІІ Азия ойындарында спорттық бағдарлаудан Аслан Тоқбаев алтыннан алқа тақса, конькиші Дмитрий Бабенко өз қоржынын екі күміс және осынша қола медальмен толтырды. Оқушылардың құрама командасы республикалық қысқы V спартакиадада жүлделі 3-ші орынды иеленді.
Өңір басшысы Серік Біләлов Қызылжар өңірінің үздік спортшылары және жаттықтырушыларымен кездесуде 15 спортшы әкім тағайындаған стипендия алатынын, былтыр 7 адамға пәтер берілгенін айта келіп, марапаттау рәсімін жалғастырды. А.Тоқбаевқа жайлы пәтердің сертификаты, Д.Бабенкоға ақшалай сыйлық табыс етілді. «Ақша қар – 2011» облыстық спартакиадасының жеңімпаздары арнайы кубокқа ие болды. Бір топ бапкер дипломдармен марапатталды.
Жиынға қатысқан Білім және ғылым министрлігі денешынықтыру ғылыми-практикалық орталығы директорының орынбасары Бауыржан Рамазанов ауыл спортын дамытуға қосқан зор үлесі үшін Қазақстанның Еңбек Ері Геннадий Зенченкоға, облыс әкімінің орынбасары Айдарбек Сапаровқа, аудан әкімдері Марат Тасмағанбетовке, Владимир Бубенкоға, Рүстем Елубаевқа орталықтың кеуде белгілерін тапсырды.
Серік Сұлтанғазыұлы өз сөзінде 2011-2012 жылдары 2,5 миллиард теңгеге спорт кешені салынатынын, жобалық-сметалық құжаттарын дайындауға 30 миллион теңге бөлінгенін жеткізді.
Өмір ЕСҚАЛИ.