Мерейтойлық монета мен пошта маркасы айналымға шығарылды

Кеше Сыртқы істер министрлігінде Шанхай ынтымақ­тас­тық ұйымының (ШЫҰ) құрылғанына 10 жыл толуына бай­ланысты «Шанхай ынтымақтастық ұйымына – 10 жыл» ме­рей­тойлық монетаның тұсаукесері және Қазақстанның ШЫҰ-ға төрағалығына орай «Қазақстан Республикасының Шанхай ынтымақтастық ұйымындағы төрағалығы» атты пошталық марканың рәсімі болды. Қазақстан Сыртқы істер ми­нис­трлігінің ерекше тапсырмалар жөніндегі елшісі, еліміздің ШЫҰ мәселелері бойынша ұлттық үй­лестірушісі Шахрат Нұрышевтің хабардар етуінше, Қазақстан 2010 жылдың маусымынан бастап ШЫҰ-ға төрағалық етіп келеді. Еліміз ұйымға мүше барлық мемлекеттермен келісілген 2010-2011 жылдарға арналған Іс-қи­мыл жоспарын және Елбасы бекіткен Қазақстан Республи­касы­ның ШЫҰ-ға төрағалығының Іс-қимыл бағдарламасын басшы­лық­қа ала отырып, төраға ретінде белсенділікпен жұмыс істеуде. Он бір ай ішінде төрағалық ая­сында ұйымға мүше мем­лекет­тердің аумағында 100-ге жуық түрлі деңгейдегі және пішіндегі іс-шаралар өткізді. Қазақстанның осындай беделді ұйымдағы төр­аға­лығы 15 маусымда Астанада ШЫҰ-ның 10 жылдығына ар­нал­ған саммитпен аяқталғалы отыр. Алдағы іс-шараның мерейтойлық сипатын және Қазақстанның ұйым тарихындағы осындай елеулі оқиғаның қарсаңында төраға­лық етуін ескеріп, Қазақстан Сырт­қы істер министрлігі ШЫҰ хатшылығының қолдауымен, сон­дай-ақ Ұлттық банкпен және «Қаз­пошта» АҚ-пен бірлесе оты­рып, естелік монетаны және пош­талық марканы айналымға шығарды. – Бүгінгі «ШЫҰ-ның 10 жыл­дығы» атты мерейтойлық моне­та­ның тұсаукесері және «Қазақ­стан Республикасының ШЫҰ-дағы төрағалығы» маркасының сал­танатты өшіру рәсімі Қазақ­стан­ның төрағалығы, Шанхай ын­тымақтастық ұйымының қыз­меті және Астанада өтетін саммит туралы оң сипаттағы ақпа­рат­қа қосқан біздің ортақ үле­сіміз болып табылады. Аталған монета мен марка халықаралық филателистер мен нумизматтар тізбелерінде лайықты орын аларына сенімдіміз, – деді Шахрат Нұрышев. ШЫҰ-ның Бас хатшысы Мұ­ратбек Иманалиевтің атап өтуін­ше, Қазақстанның төрағалығы белсенді әрі қарқынды жүруде. ШЫҰ-ға мүше мемлекеттердің қол­дауымен алдағы мерейтойлық саммит өз деңгейінде өтеді. Монета мен пошта маркасының шы­ғарылуы ұйымның 10 жылдық мерейтойына үлкен тарту болмақ. Бұдан соң Ұлттық банк төр­аға­сының орынбасары Бақытжан Тәжияқов пен «Қазпошта» АҚ-тың басқарма төрағасы Әркен Арыстанов мерейтойлық монета мен пошталық марканың сыртқы көріністеріне сипаттама берді. Бақытжан Тәжияқовтың айтуын­ша, мерейтойлық монетаның үс­тіңгі бетінде ШЫҰ-ға қатысушы мем­ле­кеттердің әлем кар­тасын­дағы орналасқан аумақ­тары бейнеленген. Оны қоршаған «Шанхай ын­ты­мақ­тастық ұйы­мы» деген сөздер қазақ, орыс және қы­тай тілдерінде жазылған. Моне­таның екінші бетінде еліміздің мем­лекеттік ны­ша­ны – елтаң­баның бейнесі ор­наластырылған. Монета 4 мың данамен шығары­лып отыр. Құны 6 мың теңге, таза күмістен жасалған. – 15 маусымда Астана әлемдік саяси қоғамдастық өкілдерінің на­зарын аударатын ірі халық­аралық іс-шара – ШЫҰ-ның мерейтойлық саммитін қабыл­дай­тын болады, – деді «Қаз­пош­та» АҚ-тың басқарма төрағасы Әркен Арыстанов. – Саммитті өткізу қарсаңында «Қазпошта» Қазақстанның ШЫҰ-ның басым­дылығына қол жеткізуге деген ұмтылысын, Орталық Азиядағы бейбітшілікті, қауіпсіздікті және тұрақтылықты қолдай отырып, ұйымның құрылғанына және Қа­зақстанның ШЫҰ-ға төрағалы­ғына арналған мерейтойлық пошта маркасын шығарды. Маркада ШЫҰ логотипі және қазақ, орыс, ағылшын, қытай тілдеріндегі мәтіндік композиция бейнеленген. Марканың құны – 210 теңге, көлемі – 28 х 40 мм, та­ралымы – 50 000 дана. Перфо­ра­циясы жоталы, төрт түсті бояумен, офсеттік тәсілмен басылған. Суретшісі – Данияр Мұхамед­жанов. Мерейтойлық пошта мар­ка­сы Қазақстан Республикасы­ның пошта маркалары коллек­циясындағы 729-шы марка болып табылады. Әлисұлтан ҚҰЛАНБАЙ.