...пәтерлерге қоныстанды
Жақында Хромтау қаласындағы Дөң тау-кен байыту комбинатының 65 қызметкерінің отбасы баспаналы болды. Жаңа пәтер кілттерін алғандардың бәрі де кәсіпорынның жас жұмысшылары мен мамандары. Бір, екі және үш бөлмелі пәтерлер оларға он бес жылға жылдық өсімі 1 пайыздық несиемен берілді. Бұл пәтерлер аса қымбат емес, бір шаршы метрі 80 304 теңге тұрады.
Бұл «Қазхром» ТҰК-ның 2007 жылдан бастап корпоративтік тұрғын үй бағдарламасы аясында салған бесінші үйі болып табылады. Тұрғын үйді салуға кәсіпорын 432 миллион теңге жұмсады. Аталған бағдарлама бойынша алтыншы үйдің құрылысы жүргізілуде. Жалпы, кәсіпорында жұмысшы-қызметкерлерге әлеуметтік жағдай жасауға баса көңіл бөлінген.
Сатыбалды СӘУІРБАЙ, Ақтөбе облысы.
...балабақшаның аты – «Нұрай»
Жақында Тараз қаласындағы «Астана» шағын ауданында «Нұрай» деп аталатын 280 бүлдіршінге арналған жаңа балабақша ашылды. Ғимараттың құрылыс жұмысын өткен жылдың тамыз айында «Бином» ЖШС қолға алған болатын.
Сметалық құны 382,403 млн. теңгені құраған балалар бақшасында 12 топ бөлмесі бар. Әдіскерге, психологқа, музыкантқа, медицина қызметкеріне, дене шынықтыру маманына арналған бөлмелер де қарастырылған.
Құрылыс компаниясы, сондай-ақ, балалар бақшасын бүлдіршіндерге арналған қажетті жиһаздармен, ойыншықтармен толығымен жабдықтады.
Көсемәлі СӘТТІБАЙҰЛЫ,Тараз.
...басшы тағайындалды
Еліміздің мұнай алыптарының бірі – «Маңғыстаумұнайгаз» АҚ-тың басшысы ауысты. Акционерлік қоғамның бас директоры болып бұған дейін Мұнай және газ министрінің орынбасары қызметін атқарған Әсет Мағауов тағайындалды. Ол – Мәскеудің Губкин атындағы мемлекеттік мұнай және газ академиясының түлегі. Вице-министрлікке дейін «ҚазақОйл», «Мұнай және газ тасымалдау», «ҚазМұнайГаз» ұлттық мұнай-газ компанияларында, «ТеңізШевройл» жауапкершілігі шектеулі серіктестігінде лауазымды қызметтер атқарған.
Ал «Маңғыстаумұнайгаздың» бұрынғы бас директоры Алик Айдарбаев Астанаға ауысып, «ҚазМұнайГаз» ұлттық компаниясы» АҚ-тың басқарушы директоры болып тағайындалды.
Жоламан БОШАЛАҚ, Ақтау.