Осы күндері Қазақстан Теннис федерациясы 7-9 шілде аралығында Дэвис кубогының ширек финалдық матчында Аргентина құрамасымен кездесетін еліміздің бас командасына қолдау көрсету мақсатында жанкүйерлерден құралған топты жасақтау үшін «Жанкүйер, сен Аргентинадағы ойынға керексің!» атты шара өткізуде.
Бұл шараның мақсаты – жанкүйерлер арасында Аргентинаға арналған жолдаманы иелену үшін ұтыс ойындарын өткізіп, сонда жеңімпаз атанғандарға Буэнос-Айрес қаласына барып-келетін билетті, қонақ үй түбіртегі мен стадионға кіретін билетті тапсыру.
Кеше Астанадағы Теннис федерациясының кеңсесінде осы акцияның аясында өткізілген алғашқы шараның қорытындысы жарияланып, Аргентинаға жолдаманы иеленген екі жанкүйердің есімі белгілі болды. Олар – Арал қаласының тұрғыны Мейрамбек Шалжанов пен астаналық Дамир Оразов. Жолдама иелерімен кездесуде ҰТФ вице-президенті Әділ Бөрлібаев аталмыш акцияның ережелерімен таныстырып, оның қорытындысы қалай шығарылғанынан хабардар етті.
Қазақстан Теннис федерациясы мұндай шараны еліміз құрамасының Чехия командасымен болған соңғы кездесуінен кейін өткізуді қолға алды. Қазір ҚТФ еліміздің бас командасын Дэвис кубогының ширек финалдық матчында қолдау көрсету үшін жанкүйерлерді Аргентинаға көптеп апаруды мақсат етіп отыр. Осыған байланысты Теннис федерациясы мамыр айынан бастап ұлттық құрамаға болысып, оның ойындарын барынша қолдаған жанкүйерлер арасында Аргентинаға жолдаманы жеңіп алуға арналған түрлі шаралар өткізе бастады. Мұндай шаралар алдағы кезде де жалғасады. Ал Дэвис кубогының ширек финалдық ойындарына арналған алғашқы жолдама Қазақстан мен Чехия құрамаларының арасында өткен кездесуде отандастарымызға ең көп қолдау көрсеткен жанкүйерлерге берілді. Осы ойын кезінде және одан кейін www.sport.kz сайтында Аргентинаға жолдама алған Мейіржан Шалжанов пен Дамир Оразов командамызға ең көп қолдау көрсеткен екен.
Бұған дейін Beeline компаниясы мен Теннис федерациясының ұялы байланыс операторы мен БАҚ өкілдері арасында 7-9 шілде күндері Буэнос-Айресте өтетін матчты тамашалау үшін конкурстың жарияланғанын хабарлағанбыз. Оның ережесін тағы да естеріңізге сала кетсек, БАҚ арасындағы конкурстың жекелеген номинациясында мерзімді баспасөзде және телеэфирде 2011 жылдың 5-27 мамыр күндері аралығында шыққан ең үздік материалдардың екі авторы жеңімпаз болып танылады. Командалық номинацияда БАҚ арасында екі редакция таңдап алынады. Мұнда 2010 жылдың желтоқсан айынан бастап, 2011 жылдың 27 мамырына дейін отандық ақпарат құралдарында теннис туралы ең көп жазған ұжым жеңімпаз атанады.
Ал Beeline абоненттері арасында өтетін байқауда 5-27 мамыр күндері аралығында демалыстарды есептемегенде күн сайын www.beeline.kz мен www.ktf.kz сайттарда, компанияның Facebook, Vkontakte және twitter әлеуметтік желілеріндегі ресми топтарында теннис туралы қойылған екі сұраққа және конкурстың қорытындысындағы 34 сұраққа ең көп жауап берген бір абонент Дэвис кубогының ширек финалдық кездесуін тамашалау үшін тегін билетке ие болады.
Дастан КЕНЖАЛИН.