Биылғы халықаралық балалар күнін Мәскеу қаласында қарсы алған балғын таланттарымыз да бар. Өнерсүйер қауымға ерекше қабілетімен танылып жүрген 10 жастағы Айбек Ерназардың есімі бізге бұған дейін де таныс болатын. Осы өреніміз Мәскеу қаласында өткен «Балалар алақанындағы күн» атты халықаралық байқаудың бас жүлдесін – Гран-приді жеңіп алып, туған қаласына қуанышпен оралды.
Алматы қаласындағы №175 Жаңа ғасыр гимназиясында оқитын Айбек жуырда ғана ұйымдастырылған жас өнерпаздардың республикалық «Шаттық» фестиваліне қатысып, оның да бас жүлдесін иемденген болатын.
Бес жасынан бастап ән айтып келе жатқан жеткіншек «Әнші болғым келеді», «Мен бақытты баламын» сияқты өнер байқауларына қатысып, көрерменнің көзіне түсіп жүрген-ді. Ол әнші Мақпал Жүнісовамен «Қазағым» әнін бірге орындап, осы клипі арқылы елге танылған жас талант.
Репертуарында «Ойна, балақай», «Анашым», «Әліппем» сияқты 30-ға тарта әні бар балғын өз орындауындағы бірқатар әндерге клиптер де түсіріп үлгерген. Жасы бар болғаны онда болса да өзіне үлкен мақсаттар қойып үлгерген Айбек биыл «Сұлуым» атты жаңа жоба үстінде жұмыс істеп жатыр.
Айнаш ЕСАЛИ.
Алматы.
––––––––––––
Суретте: 10 жасар жүлдегер Айбек Ерназар.