...жоғары оқу орны отау тігеді
Кеңес Одағының Батыры, жерлесіміз Жәлел Қизатов атындағы ауыл шаруашылығы колледжі – Қызылжар өңіріндегі байырғы оқу орындарының бірі. Қазір мұнда тоғыз мамандық бойынша ауыл шаруашылығы саласына мамандар әзірленеді. Оқушылардың саны 700-ден асады. Былтыр «Жол картасы» бағдарламасы аясында жатақхана, оқу корпустары күрделі жөндеуден өтіп, материалдық-техникалық база нығайтылды, қазіргі заманғы құрал-жабдықтар, қондырғылар орнатылды.
Енді осы оқу орны агротехникалық институтқа айналдырылмақ. Бұл жөнінде облыс әкімі Серік Біләлов Түмен аграрлық институты басшыларымен тікелей бейнебайланысқа шыққанда мәлімдеп, білім беру саласындағы екіжақты келісім-шарттың ойдағыдай орындалатынына сенім білдірді. Ресейлік әріптестеріміз қашықтықтан оқыту жүйесіне дайын екендіктерін білдірді.
Өмір ЕСҚАЛИ,
Солтүстік Қазақстан облысы,
Есіл ауданы.
...мүсіндер жан сергітуде
Бүгінде Астанада тұратын белгілі суретші және мүсінші А.Назарқұлдың есімі, әсіресе, тараздықтарға жақсы таныс. Өйткені, оның шығармашылық еңбек жолының көп жылдары туған қаласында өтіп, осы қаланың абырой-атағын аспандатуға арналды.
Жақында ол Астанадан келіп, тараздықтарға өзінің қолынан шыққан жаңа мүсіндерін ұсынды. Енді тараздықтар мен оның қонақтары шебердің қолынан шыққан тылсым сырлы туындыларды қаланың даңғылдары мен көшелерінің бойынан, гүлзарлар мен саябақтардан тамашалайтын болады.
Облыс басшылығы Тараздан шыққан талант иесінің туындыларын жылы қабылдады.
Көсемәлі СӘТТІБАЙҰЛЫ,
Жамбыл облысы.
...«Неке сарайы» ашылды
Жезқазған қаласында сәулеттік өнердің соңғы үлгісімен салынған шынылы пирамида ғимараты пайдалануға берілді. Онда неке қию салтанаты өткізіліп тұрады.
Металлургтер саябағы бойындағы бұл әдемі нысан қала көркіне ерекше сән береді. Неке қию залы орналасқан ғимараттың екінші қабатында шаһар тарихына арналған мұражай бар. Отау тіккен жас жұбайлардың алғашқы бір тобы осы жерден неке куәлігін алды.
Айқын НЕСІПБАЙ,
Жезқазған.