Бәсекенің бел ортасы

Астанада жасөспірімдер арасында өтіп жатқан әлем чемпионаты күн өткен сайын қыза түсуде. Әзірше боксшылар арасын­да іріктеу жекпе-жектері өтіп жатыр. Енді бір-екі күннен кейін іріктеуден сүрінбей өткен бозбалалар ширек финалға шы­ғып, әрі қарай жүл­делі орын­дарға таласатын болады. Ал қазіргі іріктеу айқастары басқа елдерді айтпағанда, біздің 13 қарадомалақ баламызға на­ғыз сы­нақ алаңына айналғанын көріп отыр­мыз. Өйткені, күн са­йын кеш­ке дейін  жанкүйерлер ал­дында қа­ра терге түсіп қол­ғап түйістіріп жатқан қаракөз­дері­міз үшін бұл әлем чем­пио­наты олар­дың өмірін­дегі  ең үл­кен жарыс. Міне, осын­дай сын­нан сүрінбей өту бокс­шы­лар үшін ел алдын­дағы үлкен жауапкершілік деуге болады. Осы ретте 15-16 жаста­ғы құрама мүше­лері­нің жеңіске жету үшін бойын­дағы бар­лық күш­ті шаршы алаңда сарқа жұм­сап жатқанын атап өткен жөн. Дүйсенбі күні үш бокс­шы­мыз алғашқы екі күнде жеңіске жеткен төрт құрдасы сияқты қарсы­ластарын жеңіп, келесі айналымға жолдама алды. Осы күні 48 кило салмақтағы Заңғар Темірхан Эл­вис Севернио Родригесті (Доминикан Республи­ка­сы), Қайыргелді Дәуітбек (63 кг.) Ілияс Адзинаевті (Беларусь) жеңсе, 70 кило салмақ­та­ғы Дәулет Байғаба неміс Норберт Шоелхаммарден 10:7 есебімен басым түсті. Бұл айқас­тар­дың ішінде Қайыргелді Дәуіт­бек қарсыласын екінші раундта сабап, жеңіске жетті. Содан әрі қа­рай жекпе-жектің қиын бола­рын білген Беларусь бапкерлері кездесуді тоқтатып, жеңілісті мойын­дауға мәжбүр болды. Сол күні біздің Рауан Затулла (52 кг.) шаршы алаңдағы алғашқы кездесуін өткізіп, беларусь Эдуард Вахадан жеңіліс тапты. Одан кейін Ерболат Ермеков (57 кг.) екінші рет рингке шығып, ол да қарсы­ла­сынан айласын асыра алмады. Бұл айқас тепе-тең деңгейде өткені­мен төрешілер жеңісті үнді Кумар Сандипке беріп жіберді. Осы чемпионатта басқа елдер­дің де боксшылары жеңіске жету үшін аянбай тырысып жатыр. Ал­дыңғы күні түріктер Әзербай­жан­ның есесін армяндардан қайтарды. Әзербайжандар да қарап отырған жоқ. Дүйсенбі күні олар төрт кездесу өткізіп, соның екеуінде же­ңіс­ке жетті. Ресей боксшылары бол­са төрт жекпе-жектің бәрінде қарсы­лас­тарын айқын басым­дық­пен ұтты. Әлем чемпионатында жүл­деге үміт­керлердің бірі Украина құ­ра­ма­сының тынысы енді ашылған сияқ­ты. Қазір олардың барлық бокс­шы­лары жақсы нәтиже көрсетуде. Дастан КЕНЖАЛИН.