Отанымыз сіздерді ұмытпайды

Таяуда Алматыдағы ұлт­тық құраманың «Талғар» ба­за­сында еліміз футболының бір топ ардагерлері Қазақстан футбол федерациясының сер­ти­фикатына ие болды. Бұл құжат бойынша енді қазақ фут­болы­ның бастауында бо­лып, оның дамуына үлес қос­қан ардагерлер өмір бойы ҚФФ-дан стипендия алатын болады. Олар мына саңлақтар: Тимур Санжарұлы Сегізбаев – КСРО спорт шебері, Қазақ КСР еңбек сіңірген жаттықтырушысы; Евгений Иванович Кузнецов – КСРО спорт шебері, Қазақ КСР еңбек сіңір­ген жаттықтырушысы; Геннадий Григорьевич Костюченко, – КСРО спорт шебері; Роберт Овакимович Антарян – КСРО спорт шебері; Виктор Алексеевич Абгольц – КСРО спорт шебері; Сейітжан Берікбайұлы Байшақов – КСРО спорт шебері; Борис Федорович Ищенко – КСРО спорт шебері; Владимир Сергеевич Болотов – Қазақ КСР еңбек сіңірген жат­­тықтырушысы; Анатолий Гав­­ри­лович Колибердин – Қазақ КСР еңбек сіңірген жат­тық­тыру­шысы; Болат Бекенұлы Ғалиев – Қазақ КСР еңбек сіңірген жат­тық­тырушысы; Алек­сандр Николаевич Жуйков – КСРО спорт ше­бері; Юрий Федорович Беласиков – КСРО спорт шебері; Өмір­бек Рақымжанұлы Бекбосынов – КСРО спорт шебері; Владимир Николаевич Чеботарев – КСРО спорт шебері; Кездесуде ҚФФ вице-президенті Сейілда Байшақов сөз алып, футбол федерациясы жоғарыдағы ар­да­герлердің сіңірген еңбектерін ескеріп, соңғы жылдары оларды әлеу­­меттік жағынан қолдау мақ­са­т­ында жұмыс істеп жат­қан­да­рын атап өтті. Қазақстан ұлт­тық құра­ма­сының бас бапкері Мирослав Беранек еліміз футболының бас­тауын­­да болған азаматтармен та­ныс­қанын зор мәртебе санайты­нын айтса, ардагерлер өз кезегінде ҚФФ-ға ризашылықтарын білдіріп, қазақ футболына баталарын берді. Ардагерлерге стипендия таға­йын­дау ҚФФ президенті Әділбек Жақсыбековтың идеясы екенін, енді осы азаматтар ай сайын футбол федерациясынан 30 000 теңге көлемінде стипендия ала­тын­дарын атап өткен жөн. Оны жасы 63-тен асқан, «Қазақстан Респуб­ли­касына еңбек сіңірген жаттық­тыру­шы», «Қазақстан Республи­ка­сына еңбек сіңірген спорт шебері», «Қазақстан Республика­сы­ның халықаралық деңгейдегі спорт шебері», «Қазақстан Рес­пуб­ликасының спорт шебері» деген атақтары бар ардагерлер ала алады. Сонымен бірге олардың КСРО кезінде алған спорттық атақтары да ескерілетін болады. Қазақстан футболының ардагерлері осы жылдың ақпан айы­нан бері жеке қаржылық қол­дау­ға ие болып отыр. Дастан КЕНЖАЛИН.