Заңсыз әкелінген ет өнімдері тәркіленді

Үстіміздегі жылдың 2 тамы­зы­нан 9 тамызына дейін Ауыл шаруашылығы министрлігінің қызметкерлері Кеден одағы мін­деттерінің аясында еліміздің өңір­лерінде сауда орындарына келетін ет өнімдерінің малдәрігерлік-сани­тарлық қауіпсіздігін тексеру мәселесі бойынша рейд өткізді. Осы шара барысында «Ақтау-Порт», «Морпорт», «Темір-Баба» ЖШС-ларының және бірқатар кәсіпорындардың өткізу пункттері мемлекеттік малдәрігерлік бақы­лау органдарының тәртібіне сәй­кес тексерістен өтті. – Ақтау қаласындағы «Компания ХАН» ЖШС-ның қойма­лары­нан тексеріс кезінде 59 тонна ірі қара мал еті табылды. Құжаттарға сәйкес бұл ет біздің елімізге Австралиядан әкелінген көрінеді, – дейді министрліктің баспасөз қыз­меті. Тексеріс барысында бұл ет өнімдерінің ешқандай малдәрі­гер­лік-санитарлық талаптарға сай емес­тігі анықталды. Сонымен бір­ге, «Компания ХАН»  ЖШС-ның аумағында одан әрі жүр­гізілген тексеріс барысында тағы да ет өнімдері толтырылған үш контейнер табылды. Бұл контейнерлерде 113 тонна ет сақта­лып­ты. Құжат бо­йынша, бұл өнім­дер­д­і Австра­лия­дан «Юнайтед Индастриес» ЖШС әкелген делінген. Бірақ, са­рап­шы­лар­дың мәлім­деуін­ше, іс жүзінде бұл ет өнімдері Австралиядан емес, Оңтүстік-Шығыс Азия елдерінен жеткізілген көрінеді. Ал Кеден одағы талаптары бойынша бұл  елдерден біздің аумаққа ет өнім­дерін әкелуге тыйым салынған. Міне, осындай жан-жақты жүр­гізілген тексеріс қорытынды­сын­да, Ауыл шаруашылығы министрлігі әкелінген жері беймәлім 200 тонна етті тәркіледі. Бұл өнімдердің жалпы құны 170 миллион теңге болады. «Азық-түлік өнімдерінің қауіпсіздігі туралы» Қазақстан Республикасының заңына сәйкес тәркіленген еттің бәрі жойылды. Жарас СӘДУАҚАСОВ. Астана.