Орталық сайлау комиссиясының жаңадан сайланған Парламент Сенатының депутаттарын тіркеуіне байланысты палата депутаттарының жиналысы болды, деп хабарлады Парламент Сенатының баспасөз қызметі.
Жиналысты аша келіп Сенат Төрағасы Қайрат Мәми биылғы 19 тамыздағы сайлау нәтижелері бойынша еліміздің Орталық сайлау комиссиясы жаңадан сайланған Сенат депутаттарын тіркегенін және енді сайланған әріптестері депутаттық өкілеттіктерін жүзеге асыруға бар күш-жігерін, білімі мен тәжірибелерін арнайтынына сенім білдірді.
Қ.Мәми Парламент қызметіне және ұлттық заңнаманы қалыптастыруға қосқан қомақты үлесі үшін өз өкілеттіктерін аяқтаған депутаттарға алғыс айтты. Төраға сондай-ақ өздерінің мәртебелі міндеттерін табысты атқаруға жәрдемдескен олардың жоғары кәсіби шеберлігі мен іске деген жауапкершілігін атап өтті.
Қ.Мәми айтқандай, еліміздің жоғары өкілді органы өкілеттігін бекіткен, Конституцияның негізінде құрылған қос палаталы Парламент Сенатының тұңғыш төрағасы Өмірбек Байгелдидің еңбегін жұртшылық жоғары бағалайды. Қоғам және мемлекет қайраткері Ө.Байгелди төрағалық еткен кезеңде Сенат тәуелсіз Қазақстанның дамуы үшін аса маңызды заңдарды қабылдады, егемен даму жолына түскен алғашқы жылдарда уақыт талап еткен құқықтық іргетас қалыптастырылды.
Депутаттық өкілеттігін аяқтаған Нүсіпжан Нұрманбетовтің, Тасбай Симамбаевтың, Бақберген Досманбетовтің, Еділбай Иманқұловтың, Серік Аяғановтың, Аманжол Бөлекбаевтың, Жақай Нұрғалиевтың Сенатта қызмет еткен жылдардағы еңбегіне тоқталған Қ.Мәми олардың депутаттық міндеттері мен азаматтық парызын орындауда өнеге болғанын атап өтті.
Төрағаның айтуынша, Қазақстан мемлекеттілігін дамытуда құқықтық іргетас қалыптастырудағы ауқымды реформаларды жүзеге асыру үшін заңнамалық ахуал жасаудағы олардың еңбегі жаңадан сайланған депутаттарға ғана емес, келешек ұрпақ үшін де үлгі.
Өкілеттігін аяқтаған депутаттарға Алғыс хат пен естелік сыйлық табыс етілді.