Ш.Айманов атындағы «Қазақфильм» киностудиясында Мәдениет және спорт министрлігінің тапсырысы бойынша «Беткейдегі бұталар көлеңкесінде» атты жаңа толықметражды көркем фильмнің өндірісі басталды. Фильмнің режиссері − «Сіз кімсіз, Ка мырза?» фильмімен танымал Қуат Ахметов. Фильмде басты рөлді КСРО және Қазақстанның Халық артисі Асанәлі Әшімов сомдайды.
– Идея авторы – Асанәлі Әшімов. Ол 2014 жылы маған елден шалғай тұратын жалғыз басты қарт туралы фильм түсіруді ұсынды. Асанәлі ағаның ойы бойынша қария – дала философы, түрлі ғылымға қызығатын адам, – дейді Қуат Ахметов.
Түсірілім жұмыстары үстіміздегі жылдың мамыр-маусым айларына жоспарланған фильмнің сценарийін Қуат Ахметов пен ресейлік кинодраматург Одельша Агишев түркі халықтарының аңыз-әңгімелері негізінде жазған.
– Бұл жобаны іске асыру туралы ұсыныс айтқалы бері түрлі жанрдағы талай сценарий жазылды. Алайда ол сценарийлерде менің көрермендерге айтар ойым дұрыс жеткізілмеген болатын. Сондықтан да Қуат екеуміз драматургты көп іздедік. Ақыры драматург табылып, бұл мәселе оң шешімін тапты. Қазір түсірілім жұмыстарын асыға күтіп отырмыз, – дейді бұл жөнінде Асанәлі Әшімов.
Оралхан ДӘУІТ,
«Егемен Қазақстан»