Алматы жастары айға жуық Республика алаңындағы Тәуелсіздік монументінің алдында селфи жасауды сәнге айналдырмақ. Жастыққа тән жарасымды үрдіс Қазақстан Республикасының Тұңғыш Президенті күніне орай, қаладағы MEGA Park сауда, ойын-сауық орталығында студенттердің флешмобына ұласты.
«Тәуелсіздік монументіндегі селфи» 15 желтоқсанға дейін жалғасады. Бұл бастамаға 1991 жылы туған еліміздің танымал өнер майталмандары мен спорт саңлақтары белсенді қатысып, өздерінің Тәуелсіздікке қосқан үлесін насихаттайды. Осылайша жастар азаттық символы – Тәуелсіздік монументінде селфи жасау арқылы елжандылықты әлеуметтік желілер арқылы жарнамалауды көздеп отыр.
Селфиді тәуелсіздік құрдастары – жас іскер «Bugin Group» компаниясының коммерциялық директоры, «Toptyres.kz» ЖШС директоры Қуаныш Сейсембаев пен «Жайдарман» ойындарының жеңімпазы, актер Нұрсұлтан Жақсыгенов бастап, замандастарына эстафета жолдады.
Бұл іс-шаралардың тиімді өтуіне Алматы қалалық «Жас Отан» жастар қанаты мен «Алматы қалалық музейлер бірлестігі» КМҚК мекемесі ат салысуда.
Әрине, акцияның мақсаты жай ғана селфи емес. Тәуелсіздіктің символындай болған монументке тағзым ету, өзге жастарды да патриоттық іс-шараға шақыру. Акция қатысушысы селфи жасай отырып, ортақ мерекеге деген өзінің құрметін көрсетіп, Отанға деген лебіздері мен тілектерін әлеуметтік желіге #монумент25каз хэштегімен салады.
Айнаш ЕСАЛИ,
«Егемен Қазақстан»
АЛМАТЫ