Қазақстан Республикасы Ұлттық инженерлік академиясының Қазақстан Тәуелсіздігінің 25 жылдығына арналған жалпы жиналысының салтанатты сессиясы өтіп, оған қатысушылар үндеу қабылдады.
Үндеуде Қазақстан Республикасы Ұлттық инженерлік академиясы жалпы жиналысының салтанатты сессиясына қатысушылар, халықаралық және ұлттық ғылыми-инженерлік қауымдастықтардың басшылары, жетекші ғалымдар мен мамандар әлемнің дамыған 30 елінің қатарына кіруді мақсат еткен еліміздің индустриялық-инновациялық дамуының Мемлекеттік бағдарламасын, «Қазақстан-2050» Стратегиясын жүзеге асыру жолындағы Қазақстанның орасан зор жетістіктері мен ауқымды жоспарлары өздерін шын қуантатынын атап көрсетеді. Осы орайда «100 нақты қадам: баршаға арналған қазіргі заманғы мемлекет» Ұлт жоспары әлемдік экономика мен қаржы жүйесіндегі бүкіләлемдік жағдайға сай еліміздің өндіріс пен инновацияны дамытуға үлкен мүмкіндік беретіні көлденең тартылады.
«Біз осы жоспарларды жүзеге асыруға бар күш-жігерімізді жұмсаймыз. Осы ретте, Елбасының білім, ғылым, технология, инженерлік іс пен инновацияның дамуын тұрақты қолдап, көңіл бөлгені үшін шынайы ризашылығымызды білдіреміз.
Нұрсұлтан Әбішұлы Назарбаев әлемдік деңгейдегі мемлекет және саяси қайраткер ретінде жаңа Қазақстан мемлекеттілігінің негізгі авторы және рухтандырушысы болып табылады. Тәуелсіздіктің 25 жылы ішінде Н.Ә.Назарбаев барлық қазақстандықтардың бірауызды қолдауына сүйене отырып, еліміздің бүкіл әлем алдында беделін көтерді.
Әлемдік қоғамдастық Қазақстанның Еуропадағы қауіпсіздік және ынтымақтастық ұйымы мен Ислам ынтымақтастығы ұйымына төрағалық етуінің жоғары деңгейіне куә болып, біздің ел Президентінің ядролық сынақтарды тоқтату, әлемнің көптеген аймақтарындағы қақтығыстарды реттеу жөніндегі жаһандық бастамаларын қызу қолдады», делінген үндеуде.
Салтанатты сессияға қатысушылар, сондай-ақ, еліміздің барлық азаматтарын халқымыздың тарихи тағдыры мен мүддесінің ортақтығын көрсететін және бір мақсат, бір мүдде мен Қазақстанның бір болашағына біріктіретін «Мәңгілік Ел» құндылықтарын бұлжытпай сақтауға, қазақстандықтардың бүгінгі және болашақ ұрпақтарының негізгі байлығы – Тәуелсіздік жетістіктерін көбейтуге шақырады.
Соңында барлық қазақстандықтарды Қазақстан Республикасы Тəуелсіздігінің 25 жылдығы Декларациясының қабылдануымен құттықтайды.
«Егемен-ақпарат»