қазақстандық қоғамның алтын қазығына айналды
Елордадағы Тәуелсіздік сарайында Қазақстан халқы Ассамблеясы Кеңесінің ел Тәуелсіздігінің 25 жылдығына арналған кеңейтілген отырысы өтті. Оған Мемлекеттік хатшы Гүлшара Әбдіқалықова, Парламент Мәжілісінің депутаттары, Ассамблея мүшелері, қоғам қайраткерлері, ғалымдар мен зиялы қауым өкілдері қатысты.
«Бұл отырыста Ассамблеяның елдегі қоғамдық-саяси тұрақтылықты қамтамасыз етуге және этносаралық қатынастар саласындағы іс-қимылдар тиімділігін арттыруға бағытталған қызметіне қорытындылар жасалатын болады», – деді жиында сөйлеген сөзінде Гүлшара Әбдіқалықова.
Сонымен қатар, Мемлекеттік хатшы биыл басты стратегиялық құжаттар – қазақстандық біртектілік пен бірлікті дамыту және нығайту, сондай-ақ, ҚХА-ның 2025 жылға дейінгі дамуы жөніндегі тұжырымдамалар іске асырылғанына, «Мәңгілік Ел» патриоттық актісі қабылданып, Ассамблеяның институттық тұрғыдан нығайтылғанына, оның жаңа функционалдық бағыттарының жүзеге асырылғанына тоқтала келе, жалпы алғанда, 2016 жыл Қазақстан халқы Ассамблеясы үшін маңызды жыл болғанын атап өтті. Дәл осы жылы қоғамдық келісім мен медиация кеңестерінің жүйесі бекітілгенін, «Үлкен ел – үлкен отбасы» жалпыреспубликалық жобасы мен ауқымды қайырымдылық жобалары жүзеге асқанын жеткізді.
Бұған қоса, Гүлшара Наушақызы «Қазақстан жолын» жандандыру барысында Қазақстан халқы Ассамблеясы жоспарларын іске асыруда Елбасының айрықша рөл атқарып, Тәуелсіздіктің 25 жылдығына зор үлесін қосқанын айтты.
«Жақында Тәуелсіздіктің 25 жылдығына арналған Декларация қабылданды. Бұл Декларация Президенттің саяси күш-жігері мен стратегиялық ұстанымы Қазақстан дамуының үлгісін айғақтап бергенін көрсетті. Ал Қазақстан халқы Ассамблеясы Мемлекет басшысының жоба-жоспарларын жүзеге асыруда үлкен рөл атқарды. Себебі, Ассамблеяның біртектілік пен бірлікке қатысты барлық реформаларды ілгерілету және үйлестірудегі маңызы айрықша. Мәселен, биылғы жылдың 1 наурызында Мемлекет басшысының бастамасымен алғаш рет «Алғыс айту күні» белгіленді. Осы күннің шеңберінде ұйымдастырылған 10 мыңға жуық іс-шараға 3 мыңнан астам адам қатысып, «Қазақстан халқына мың алғыс!» деп өз жүрекжарды сөздерін арнады. Бұлардан бөлек, ҚХА бастамасымен «Қайырымдылық керуені» жалпыұлттық акциясы ұйымдастырылып, 240 мыңға тарта азамат 194 миллион теңге көлемінде қаржылай көмек алды», – деді Мемлекеттік хатшы.
Жұмыс қорытындысы бойынша ҚХА Кеңесі Мемлекет басшысына арналған үндеу қабылдады.
Ләйла ЕДІЛҚЫЗЫ,
«Егемен Қазақстан»