Қызылордада екі күннен бері ауыр атлетикадан ерлер мен әйелдер арасында Қазақстанның Тұңғыш Президенті күніне арналған Кубок сайысы өтіп жатыр. Оған Алматы қаласы мен барлық облыстардан 152 спортшының басын біріктірген 15 команда қатысуда.
Кешеге дейін әйелдердің – 4, ерлердің 2 салмақ дәрежесі бойынша жүлдегерлер белгілі болды. Ал 94 килоға дейінгі салмақтың жеңімпазына Илья Ильиннің арнайы Кубогі мен сертификаты табыс етіледі.
Жарыстың бірінші күні 48 килоға дейінгілер арасында Алматы облысынан келген Юлия Потасова қоссайыста 125 кг (55+70) салмақты бағындырып, бірінші орынды жеңіп алды. Екінші орынға осы облыстың келесі өкілі – Наталья Бедрик, үшінші орынға жамбылдық Айнұр Әбдіхалықова орналасты. Сондай-ақ, 53 килода Алматы қаласының атлеті Әсел Амангелді 175 кг (79+96) салмақпен алдына жан салмады. Күміс медаль Алматы облысының өкілі Александра Лачковаға, қола медаль ақтөбелік Ақмарал Үргенішбаеваға бұйырды. Ерлер арасында 56 килоға дейінгі салмақтың бас жүлдесін Алматы облысының саңлағы Игорь Сон еншіледі. Ол 235 кг (105+130) нәтижесімен бәрінен басым түсті. Екінші сатыға Алматы қаласының өкілі Асхат Ділдаев, үшінші тұғырға қызылордалық Алмат Асанханұлы жайғасты.
Жарыстың екінші күнінде әйелдердің 58 кг салмағында қостанайлық Сәуле Сәдуақасова 183 кг (83+100) нәтижесімен топ жарды. Келесі екі орынды шығысқазақстандықтар Лидия Ануфриева мен Мәдина Астамирова алды. Бұдан кейін 63 кг салмақтың мықтысы болып қызылордалық Әсем Садықова танылды. Ол қоссайыста 195 кг (85+110) салмақты еркін еңсерді. Екінші-үшінші орындарға шығысқазақстандық Дарья Павлова мен Алматы қаласының өкілі Кристина Крахалева көтерілді. Ал ерлердің 62 килоға дейінгі салмағында қызылордалық Ерболат Жоламанов үздік көрінді. Ол бұл үшін жиынтығында 263 кг (117+146) салмақты төбесіне тік ұстап тұрды. Жүлдегерлер үштігін Алматы қаласының атлеттері Анатолий Савельев пен Тимур Хасаров тиянақтады.
Жарыс 5 желтоқсан күні мәреге жетеді.
Лаура ШОҢҒАЛОВА
ҚЫЗЫЛОРДА