Жетісудың жазиралы мекені – Жаркент жерінен шыққан елімізге танымал тұлғалар жеткілікті. Солардың бірі – дәстүрлі орындаушылық шеберлігімен күміскөмей әнші атанған Қазақстанның халық әртісі Дәнеш Рақышев. Ән әлемінде өзіндік орны бар әнші соңына өшпес мұра қалдырған. Сондықтанда «Ән көгіндегі сөнбес күн» тақырыбында Дәнеш Рақышевты еске алу кешіне алыс-жақыннан өнердегі танымал тұлғалар жиналды.
Қазақ өнерінің қазынасына мол мұра қалдырған әнші жайлы Панфилов ауданының әкімі Ермек Келемсейіт мазмұнды баяндама жасады. Кеште әншінің 85 жасқа толуы құрметіне ұйымдастырылған «Ән салсаң, Дәнештей сал» байқауының қорытындысы шығарылып, бас жүлдені Талды ауылының әншісі Ерік Нүсіпбеков иеленді. Сондай-ақ, спорт түрлерінен өткізілген жарыстардағы табыстары үшін «Дәулет Жаркент» спорт клубының ұжымы бірінші, ардагерлер командасы екінші, көкталдық футболшылар үшінші орынды жеңіп алды.
Әншіге арналған арнау жырлар да аз болмады. Халықаралық Алаш сыйлығының иегері, ақын Оразақын Асқар, тағы басқалардың терең толғаныстары әнші әруағын асқақтатты.
Күмісжан БАЙЖАН.
Алматы облысы.