Бокстан Баку төрінде өтіп жатқан әлем чемпионаты жалғасуда. Сәрсенбі күні біздің құрамадан шаршы алаңға 81 кило салмақта Әділбек Ниязымбетов шықты. Бұл кездесу Астана уақытымен кеш басталды. Сөйтіп, бокс кешінің ең соңғы кездесуінде Әділбек Ниязымбетовке қарсы рингке молдовалық Владимир Челес көтерілді. Челес Молдованың елішілік жарыстарында көзге түсіп жүргенімен, халықаралық аренада айтарлықтай салмағы жоқ боксшы саналатын.
Кездесу шын мәнінде біздің боксшының басымдығымен өтті. Бірінші раундта Ниязымбетов қарсыласының осал тұсын іздеп, бірнеше әдемі соққы жасады. Одан кейін бапкерінің кеңесі бойынша психологиялық жағынан жеңу үшін соққылар дарытып, қарсыласын есеңгіретіп жіберді. Екінші раундта да осы жағдай қайталанды. Ал үшінші раунд таза қазақ боксшысының басымдығымен өтті. Сөйтіп, кездесу біздің боксшының пайдасына шешіліп аяқталды, есеп – 16:11.
Ниязымбетовтің келесі қарсыласы осал боксшы емес. Оның молдовалыққа қарағанда шеберлігі басым, біраз турнирлерде атой салған. Дегенмен, Ниязымбетовтің оны да жеңуге мүмкіндігі бар. Ал одан кейінгі жекпе-жектер туралы әзірше айту қиын. Өйткені, осы салмақта ресейлік Нихомцев, украиналық Гвоздик бар. Оның үстіне, жаңа айтқанымыздай, Әділбек Ниязымбетов ересектер арасындағы әлем чемпионатына алғаш рет қатысып отыр. Ол 2008-2009 жылдары Қазақстан чемпионы, 2007 жылы Азияның жастар арасындағы, 2009 жылы Азияның ересектер арасындағы чемпионы болған.
Осы чемпионатқа Данабек Сужанов пен Данияр Елеусінов те алғаш рет қатысып отыр. Барлық дебютанттың жастары шамалас. Басқа боксшыларымыз туралы айтсақ, алдымен ауызға екі дүркін әлем чемпионы Серік Сәпиев оралады. Сәпиев соңғы әлем чемпионатында қола жүлдеге ие болғаны белгілі. Осы жолы бұдан да биік сатыға көтерілсе деген тілегіміз бар. Аса ауыр салмақта Иван Дычко мен 91 килода Василий Левиттің де жарысты жалғастыруға мүмкіндігі жетерлік.
Дычко алғашқы жекпе-жегін серб Миллутин Станковичпен өткізеді. Оны жеңсе, Бейжің Олимпиадасының күміс жүлдегері Жан Жилейге қарсы қолғап түйістіреді. Айтқандай, осы қытай алыбын биылғы Азия чемпионатында Досжан Оспанов ұтқан болатын. Соған қарап, Дычко да намысқа тырысады ғой деп ойлаймыз. Ал Левит әуелі америкалық Уильямспен қолғап түйістіреді. Егер жеңе алса, француз Йоко Тониге қарсы шығады.
Сөйтіп, кеше кешкісін 69 кило салмақ дәрежесі бойынша Серік Сәпиев төртінші әлем чемпионатындағы алғашқы кездесуін өткізді. Оның осы жекпе-жектегі қарсыласы эквадорлық Карлос Санчес болды. Жасыратыны жоқ, бұл боксшының да халықаралық аренадағы жетістіктері ауыз толтырып айтарлықтай емес. Кездесуде соған сәйкес Сәпиевтің басымдығымен өтті. Бірінші раундта-ақ Санчес Сәпиевтің соққыларының астында қалды. Екінші раундта эквадорлық одан әрі есеңгірей түсті. Үшінші раундта Санчес нокдаун алды. Осыдан кейін-ақ экваторлықтың бапкерлері жекпе-жекті рингке орамал тастап тоқтатуға мәжбүр болды.
Сөйтіп, біздің құрама әлем чемпионатындағы төртінші күні үшінші жеңісіне жетті. Осы салмақта Сәпиевке қарсылас болатын бірнеше боксшының бар екенін атап өткен жөн.
Кеше басқа жекпе-жектер де қызықты және тартысты өтті. Әсіресе, Иран мен АҚШ боксшыларының арасындағы кездесуді солай деп айтуға болады. Ал әзербайжандар тағы бір боксшысынан айырылды. Мұның алдында Рагим Наджафов алғашқы кездесуінде жеңілген болатын.
Бүгін шаршы алаңға 64 кило салмақтағы Данияр Елеусінов шығады. Оның қарсыласы – шотландиялық Джох Тэйлор.
Дастан КЕНЖАЛИН, «Егемен Қазақстан» – Бакуден.