Тәуелсіздік – киелі ұғым және екінің біріне бұйыра бермейтін бақ. Оның қазақстандықтар ұғымында қалыптасқанына да 20 жыл. Жыл бойы өңірдегі аудан, қала мен елді мекендерде жастардың дүрмекті кездесулері, форумдары жалғасын тауып келеді. Бірін-бірі қайталамайтын басқосуларда жастардың Отанға деген жігері, сүйіспеншілігі арнасынан асып, төгілуде. Осындай жастар форумы Ескелді ауданының Қарабұлақ кентінде өткізілді.
«Ел мен жерді құрметтеу – азаматтық парыз!» тақырыбындағы жиында еліміздің Әнұраны асқақтап, мемлекеттік Туымыз биікке көтерілді. Жастардың «Жасай бер, жайнай бер – жаңа Қазақстан!», «Гүлдене бер, менің Қазақстаным!» көрнекіліктері жиналғандар назарын аударды.
Қызығарлығы – «Нұр Отан» ХДП-ның «Жас Отан» жастар қанаты аудандық ұйымының жетекшісі Индира Асанова бүгінгі тәуелсіздік туы астында тыныстаған құрбы-құрдастарының бәсекеге қабілетті білім алып, мамандық меңгеруіне барлық жағдай жасалғанын айтты.
Дәл осындай жастар симпозиумы Қаратал ауданының Үштөбе қаласында жалғасып, «Мемлекеттік рәміздер – ел белгісі, ұлт мақтанышы» тақырыбындағы іс-шарада еліміздің рәміздерін құрметтеу сезімі, елжандылық қасиет жастық жалынмен астасып, баршаның мерейін тасытты. Бүгінгі жастар білімді, әрі қоғамның дамуына үн қосатын талапшыл.
Халық көп жиналған алаңдағы асқақтаған әсем ән мен күмбірлеген күй көңілдерді сусындатып, бейбіт елдің аспанында қалықтады.
Күмісжан БАЙЖАН.
Алматы облысы.