Инвестор балабақша салып берді

Кеңес одағы ыдырап, экономикалық бай­ланыстар шіріген жіптей үзілгеннен кейін-ақ кезіндегі әп-әсем тірлігі бар Алтынды ауы­­лының күйі тайып жүре берді. Осын­дағы алтын кеніші жабылып қалды,  ауылда электр жарығы болмады, басқа да әлеумет­тік нысандардың қызметі тоқтады. Алтын­дылықтар шаһарлы жерлерге үдере көшті. Осындай күрделі кезеңде алтын кенішін сатып алған «Юбилейный» ЖШС қараусыз қал­ған кеніш өндірісінің бойына қан жүгір­туді қолға алды. Сөйтіп, ажары тайған Ал­тынды ауылының инфрақұрылымын қалпы­на келтіруді, әлеуметтік нысандарына көңіл бөлуді де ұмытпады. Мұндай игілікті іс жемісін беріп, ауылдың ажары кіре бастады, алтындылықтардың ертеңгі күнге сенімі артты. Жақында Алтынды ауылының тұрғын­дары тағы бір қуанышқа бөленді. «Юбилей­ный» ЖШС ауылдың қақ ортасынан су жаңа 75 орындық  «Балапан» балабақшасын салып, пайдалануға берді. Бұл балабақша толықтай серіктестіктің қаржысына салы­нып, жергілікті бюджетке тегін беріліп отыр. Балабақшаның салтанатты ашылуына  ауыл­­дың тайлы-таяғы қалмай үлкен-кішісі түгел жиналды. Инвесторлар Алтынды ауылының болашағымен таныстыру үшін әлемнің ондаған елдерінен қаржы құрылымдарының өкілдерін де ерте келіпті. Мерекелік салтанатта сөз алған Мұғалжар ауданының әкімі Серік Шанғұтов алтындылықтарды  қуа­ныш­ты сәтпен құттықтады. «Юбилейный» ЖШС директорлар кеңе­сінің төрағасы Борис Лузин мұндай жобаны жүзеге асыра отырып, болашақты қаржы­ландырып жатқандарын тілге тиек етті. Бүгінгі бүлдіршіндер елдің ертеңі, олар болашақ инженерлер, экономистер, білікті мамандар. Білікті мамандарсыз экономика дамымайды, өндіріс өрге баспайды. Яғни, біз өз болашағымыздың қамын ойлап отыр­мыз, деді ол. Қайыңды ауылдық округінің әкімі Ілияш Ниязова инвесторлар келгелі жасалған жақ­сылықтардың бірқатарын тарқатып айт­ты. Оның айтуынша, округке қарасты Қайың­ды, Алтынды ауылдарында  257 отба­сы тұрады, осы ауылға көшіп келуге тілек білдірушілер көп екен, алдағы көктемде 47 отбасы тұр­ғын үй салуға жер алып отырған көрінеді. Жоғарыда айтылғандардан басқа серіктес­тіктің ауылға су жеткізуге, мектепті жөн­деуге, студенттердің бір жылдық оқу ақы­сын төлеуге көмектескенін тілге тиек етті. Үш баласы серіктестікте жұмыс істейтін, немересі осы балабақшаға баратын   ауыл ағасы Абай Баймұхамбетов бата берді,  әжелер шашу шашты. «Юбилейный» ЖШС директорлар кеңесінің төрағасы Борис Лузин балабақшаның символдық кілтін аудан әкімі Серік Шанғұтовқа тапсырды. Салтанатты сәтке жиналғандар бала­бақ­шаның бөлмелерін аралап көріп, су жаңа жиһаздарына риза болған ауыл­дықтар бірін-бірі құттықтып, мәре-сәре болды. Ата-ана­ларымен, ата-әжелерімен ере келген, ертеңгі күні осы балабақ­шада тәрбие­ленетін бүлдіршіндер­дің қуаны­шында да шек жоқ. Сәби көңілдің әуестігімен жарық та таза бөл­мелерден шыққылары жоқ, мәз-мейрем. Балабақ­шаның ашы­лу салтанаты көңіл­ді концертке ұласты. Сатыбалды СӘУІРБАЙ. Ақтөбе облысы, Мұғалжар ауданы.