Биыл жазда жылдағыдай облыстың 2264 оқушысы киіз үйде демалады. Маусым-тамыз айлары аралығында Қашыр ауданында «Ауыл», Май ауданында «Ұлы дала елі» және Шарбақты ауданында «Ата бабаларымыздың салт-дәстүрлері» атаулары бар киіз үй лагерьлері жұмыс істейді. Өңірдегі Павлодар, Ақсу, Екібастұз қалалары мен аудандарда 16 лагерь ашылды. Ауылдарда әкімдіктерінің қолдауымен алдағы айларда 28 киіз үй құрылады. Бұл мақсатқа бюджеттен 2 миллион 600 мың теңгеден аса қаражат қарастырылған. Бірінші кезекте әлеуметтік жағынан әлсіз топқа жататын отбасылардың балалары қабылданады. Киіз үй лагерь бағдарламасында оқушылар қазақ тілін үйреніп, салт-дәстүрлер және әдет-ғұрыптармен танысады. Күнделікті ұлттық ойындар, түрлі конкурстар, викториналар өткізіледі.
Фарида Бықай
«Егемен Қазақстан»
Павлодар