«Эйр Астана» компаниясы жолаушыларға көрсетілетін қызмет сапасын арттыру бағытында бірқатар шараларды жүзеге асырып, жаңа жобалар қатарын молайтуда. Компания таяуда Орталық Азия мен ТМД аймағында халықаралық деңгейдегі авиациялық-техникалық орталығының құрылуындағы маңызды кезеңдерінің бірі – жөндеу цехының тұсауын кесті.
Әуе кемелерінің құрылымдық бөліктеріне, авиациялық дөңгелектерге, батареяларға техникалық қызмет көрсету және басқа да жұмыстар бұл салада бірқатар тиімділікке қол жеткізбек. Ұшақтардың құрылымдық бөліктері мен конструкциялары бойынша жаңа жөндеу орталығының ашылуы келесі жылдан бастап өздерінің әуе кемелері паркіне қызмет көрсетуде жылына бір миллион долларға жуық қаражат үнемдеуге ықпал етеді. Сонымен қатар, «Эйр Астана» республика аумағында өзге елдердің әуе тасымалдаушыларына да жоғары сапалы жөндеу қызметін көрсете алады. Ал, мұндай құқық халықаралық сертификаттармен кепілдендірілген.
Жаңа орталықтың ашылуына арналған жиында сөз алған «Эйр Астана» АҚ президенті Питер Фостер, компанияның инженерлік-техникалық қызмет көрсету бойынша директоры Тимур Якуповтың пікірінше, ұшақтарды жөндеу жоғары техникалық өндіріс болып есептелінгендіктен мұның өзі еліміздің авиациялық-техникалық қорын дамытуға игі ықпал етпек. Ұлттық әуе тасымалдаушылардың бұл жобасының басты ерекшелігі – Қазақстанда осы уақытқа дейін қолға алынбаған «C-check» ұшақтарына күрделі әрі ауқымды жөндеу жұмыстарын жүргізуді өз күштерімен атқаруға қолайлы жағдай туындауында болып отыр.
Ұшақтарды жөндеу жұмыстары төрт ауысымда жүргізіледі және тағы бір жағымды мәлімет «Эйр Астанада» жұмыс істейтін 500 маманның 98 пайызы – қазақстандық мамандар. Бүгінгі күннің өзекті талабы – мамандардың кәсіби біліктілігі десек, кәсіпорында бұл бағытта да бірқатар іс-шаралар атқарылуда. Мамандар өз білімдерін арттыру мақсатында Лондон қаласында жүйелі түрде еңбек өтілінен өтуде. «Эйр Астана» әуе компаниясындағы төрт бірдей инженердің халықаралық лицензияны иеленуі ізденіс пен іскерліктің жемісі екендігі анық.
Бақыт БАЛҒАРИНА, Алматы.