Президент тапсырмасына сәйкес, «Көкбөрі Керней баба» қайырымдылық қоры шарапатты шараларды қолға ала бастады.
Алдымен, ауылдың Керней атына аз-кем тоқтала кетейік. Осы ауыл кешегі малды ата Кернейдің ереуілдейтін жері болған. Керней тауының баурайында орналасқан ауылдың Керней өзені де әлі арнасынан ауа қоймапты. Жергілікті тұрғындар осындағы қасиетті атаның әулиебұлағын кәдімгідей мәпелеп отыр. Кеңестік заманның жайы белгілі. Ауыл атауы көпекөрінеу бұрмаланып кете барған. Корнеевка болып...
Бүгінде батыр бабаның ұлағатты ұрпақтары ауылдың түп атауын қайтарып, «Көкбөрі Керней баба» қоғамдық қорын ашып, тұрғылықты халықпен байланысын үзбейді.
Ерте көктемде қолы ашық азаматтар Керней девиантты арнайы мектебінде болып, музыкалық орталық, кір жуу машинасы, шаңсорғыш, басқа да балаларға қажетті заттарды сыйлап, тәрбиесі қиын балалармен екіжақты қатынас орнатқан еді.
Ал кешегі өткен Астана күні қарсаңында қор тағы да қомақты қаржы жұмсап, ауыл іргесінен саябақ салып шықты.
Бұл жерде мұндай істерге мұрындық болып жүретін бірнеше азаматтың есімдерін атап кетуге болады. Бақи Әбсамат, Мақсұтқан Термизұлы сынды абыз қариялар ауылдың ауызбіршілігін бәрінен де жоғары қояды. Бұған дейін көпшіліктің қолдауымен мешіт салынды. Мақсұтқан ағамыз туған өлке шежіресімен айналысып, екі кітап жазып тастаған. Аққұла еңбектің және бірі – ауыл әкімі Төлеген Іргебаевқа тиесілі. Ауданда басшы қызметте болған Төлеген осы ауылға өзі сұранып келіп, әпкесі, жоғарыдағы қордың атқарушы директоры Мира Атамалқызымен бірігіп, ауыл төрінен ойып тұрып Керней саябағын салуды қолға алады. Және ол бақты биыл, келер жылы деп созбақтамай Астана күнінде қолдануға беруді ойластырған.
Саябақтың тұсаукесер салтанатына аудандық мәслихаттың хатшысы Асхат Әли қатысып, қор мүшелеріне аудан әкімі Ш. Мамалиновтың Алғыс хатын тапсырды.
Осы ауылдан облыстық мәслихатқа депутат болып сайланған Еркін Ахметов те бұл істен сырт қалмайтынын жеткізді. Өзінің жеке шаруашылығы бар Еркін қашанда көмек қолын ұсынып жүреді.
– Елбасымыздың өзі қолдап отырған жоба ғой бұл. Сырттан көмек күтпей өзіміздің әрекеттеніп жатқанымыз қуантады. Бұл бақтың әйтеуір, бір салынатыны айдай анық. Оған мемлекет қаржысы жетеді. Алайда, оны күтіп отыратын уақыт қайда? Олай болса қолда бар мүмкіндікті барынша осылайша пайдалануымыз керек, – дейді Еркін Қабайұлы, – бүгін болмағанымен мен де бұл бақта қолымның таңбасын қалдырамын.
Осы өңірдің тағы бір халық қалаулысы Евгений Әлпейісов те Еркіннің сөзін қолдап, қуаттап жатты.
Мирас АСАН, «Егемен Қазақстан»
Қарағанды облысы, Бұқар жырау ауданы