Метро арқылы жүйткитін күндер де алыс емес, ал оған дейін алматылықтардың бір легі сәулеті келіскен, самаладай жарық метро стансаларына түсіп, жер астында жолаушылаудың қандай екенін байқап көрді. Осылайша, өткен демалыс күндері Алматы метрополитенінде ашық есік күні өтті.
Қалалықтар үшін алғаш рет Гоголь мен Панфилов көшелерінің қиылысындағы «Жібек жолы» стансасы есігін айқара ашып, метро қызметкерлері көпшілікті бірнеше шақырым саяхат жасауға шақырды. Бірінші болып метроға отыру мүмкіндігін жібермеген алматылықтар күні бойы бірнеше стансаны аралап, осындағы қала тіршілігіне арналған фотокөрмені тамашалады.
Алғаш жер асты арқылы жолаушылаған жұртшылық Абай даңғылы мен Фурманов көшесінің қиылысына орналасқан «Абай» стансасына, одан кейін опера театрының тұсынан шығатын «Алмалы» стансаларына сапар шекті.
Абай-Манас көшелерінің қиылысынан басталатын Алматы метросының алғашқы тармағы «Саяхат» автовокзалына дейін созылатынын және ол жеті стансаны құрайтындығынан бұған дейін де хабардар еткенбіз. Бұл аралықты жер асты пойыздары 12 минутта жүріп өтеді, құрамалар әр 9 минут сайын стансаларға келіп отырады.
Енді ел метро толайым іске қосылатын ел Тәуелсіздігінің 20 жылдығын күтіп отыр.
Бұл күндері Алматы метросының екінші тармағының да құрылысы жүріп жатыр. Нәтижесінде Алматы метросы қаланы «Қалқаман» поселкесімен жалғайтын болады.
Қазірге белгілісі, метрода жүру ақысы 100 теңге болмақ. Қала әкімдігі метро үшін мұндай жолақы қымбат емес деп есептейді. Көшедегі көлік кептелістерінде жүйкені жұқартып, уақытты зая кетіргенше сәулет өнері салтанат құрып тұрған стансаларда қыдырып, керек жеріңе жайлы вагондар арқылы көзді ашып-жұмғанша жетіп алудың дұрыстығын айтады.
Айнаш ЕСАЛИ.
Алматы.
-----------------------------------
Суретті түсірген Юрий БЕККЕР.