Алдағы жылы елорданың Есіл өзеніндегі теплоходттарда шағын дәмханалар пайда болады. Бұған қоса, тамақтану орындарын да ашу көзделіп отыр, деп хабарлайды Астана әкімдігінің медиа орталығы.
«Келесі жылы кеме маусымына дайындық барысында жолаушылар тасымалдайтын теплоходтарда дәмхана мен шағын тамақтану орындарын ашуды көздеп отырмыз», - деді «Есіл Астана» МКҚК директоры Қанат Алин. Оның айтуынша, мекеме қалалық әкімдікке қосымша кемелер сатып алу жөнінде тапсырыс берген.
«Сондай қажеттелігіміз бар. Астана дамып, тұрғындар мен келушілер саны артып келеді. Қаланың туристік әлеуеті зор. Біздің туристерге қызмет көрсетуге мүмкіндігіміз мол», - деді мекеме директоры.
Айта кетейік, биылғы жылы Есіл өзеніндегі кемелер 35 мыңнан астам жолаушыға қызмет көрсетті. Бұл жылдағы жоспардан 60 пайызға артық. Сондай-ақ келесі жылы өзендегі такси қызметі іске қосылып, Астанадағы алғышқы өзен вокзалының құрылысы аяқталады деп күтілуде.