Астықты Ақмола облысы мерекелі жылғы егін орағын бұрын-соңды болмаған рекордты көрсеткішпен аяқтады. Қамбаға 6 миллион тоннадан астам ырыздық дәні жеткізілді. Мұның 1 миллион 25 мың тоннасы Жарқайың ауданы диқандарының үлесінде.
Аудан әкімі Аманбек Қалжанов газетіміздің тілшілер қосына хабарлағанындай, барлық 509 мың гектар алқаптың әр гектарынан 20 центнерден астам қызыл дән жиналды. Жаңа өнімнің сапасы да жоғары. Яғни, оның қамырлылығы 30 пайызға дейін жетеді.
Рекордты өнім – жарқайыңдық диқандардың, алғашқы тың игерушілер ұрпағының қажырлы еңбегінің, жер өңдеудің заманалық технологиясын енгізудің, жаңа әрі қуатты техникаларды пайдаланудың, жоғары сапалы тұқымдық материалды қолданудың, барлық істегі ұқыптылық пен тиімділіктің жемісі.
Жарқын жүзді жарқайыңдықтарға облыс әкімі құттықтау хат жолдады.
Бақберген АМАЛБЕК,
Ақмола облысы.
Суретте: Аудан әкімі А.Қалжанов «Костычев» және «Темірлан» ЖШС директорлары Б.Қабжанов және Е.Алинмен бірге жайқалған егінжай теңізінде.