Кеше Мемлекет басшысы Нұрсұлтан Назарбаев Біріккен Араб Әмірліктеріне жұмыс сапары аясында БАӘ Қарулы Күштері Жоғарғы Бас қолбасшысының орынбасары, Абу Даби әмірлігінің мұрагер ханзадасы шейх Мұхаммед бен Заид Әл Нахаянмен кездесті, деп хабарлады Қазақстан Республикасы Президентінің баспасөз қызметі.
Тараптар екіжақты өзара іс-қимылдың жай-күйі мен перспективасын талқылады.
Қазақстан Президенті қазіргі уақытта «Абу Даби Плаза» көп салалы кешенінің жобасы іс жүзінде құрылыс жұмыстары сатысына көшкенін атап өтті.
Тараптар посткеңестік кеңістіктегі жалғыз ислам банкі – «Әл-Хиляль» банкінің табысты қызметін ерекше атап өтті.
Мұрагер ханзада екіжақты ынтымақтастықтың қарқынына қанағаттанушылық білдірді және БАӘ Қазақстанмен мұнай-газ және мұнай-химия салаларында жемісті ынтымақтастықты дамытуға дайын екенін атап өтті. Әмірлік тарабы Қазақстанның ауыл шаруашылығы саласына ерекше қызығушылық танытуда. Биылғы жылы қазақстандық астықтың мол жиналғанын ескере отырып, әмірлік тарабы қазақстандық бидай экспорты мәселесін қарастыруға дайын.
Тараптар сондай-ақ, Қазақстан Үкіметі мен БАӘ Үкіметі арасында инвестицияны ынталандыру және өзара қорғау туралы келісім жобасына қол қоюға дайындыққа қатысты прогреске қол жеткізілгеніне қанағаттанушылық білдірді.
Суреттерді түсіргендер С.БОНДАРЕНКО, Б.ОТАРБАЕВ.