Жемқорлыққа қарсы күрес мемлекеттік саясаттың негізгі басымдықтарының бірі. Ол сонымен бірге салық қызметі органдары үшін де көкейкесті мәселе болып табылады. Жемқорлық әлеуметтік құбылыс ретінде салық қызметі органдарының құзыретіне теріс әсерін тигізіп, салық төлеушілердің сенімін жоғалтады. Бұған қоса мемлекеттің нарықтық экономикасының дамуын тежеп, еліміздің ұлттық және экономикалық қауіпсіздігіне едәуір кесірін тигізетіні анық.
Қазіргі таңда «Жемқорлыққа қарсы күрес туралы» ҚР Заңында барлық түсініктерге, жемқорлықты туындататын құқық бұзушылықтар мен жауапкершіліктерге анықтама берілген. Жемқорлыққа қарсы тиімді күрес жүргізу үшін азаматтық қоғам институттарын біріктіру қажет, себебі жалған экономикалық өркендеу тек жемқорлық белең алған мемлекетке ғана тән.
Осыған сәйкес мемлекеттік құрылымдарда жемқорлыққа қарсы күреске ерекше көңіл бөлініп, оның алдын алу шаралары, сондай-ақ басқарма қызметкерлері арасында да осы кеселге қарсы тұру бойынша тәрбиелік жұмыстар жүргізілуде.
Қазірге күнде салық қызметі органдарында электрондық салық қызметін ұсыну арқылы салық төлеушілермен байланыс азайтылып жатыр. Салық төлеушілер өтініштерінің орындалуын бақылайтын терминалдар, күн сайын әр түрлі мәселе-сұрақтармен келетін жүздеген салық төлеушілерге қызмет көрсететін ақпараттарды қабылдау және өңдеу орталықтары ашылған.
Бақылау жүргізу мақсатында орталықтарда бейнебақылау камералары орнатылған. Кез келген салық төлеуші өзінің ескертулері мен тілектерін білдіріп, арыз-ұсыныс жазуға арналған журнал ашылған.
Уақытында ескерту шараларын орындау мақсатында салық басқармасында 37-68-03 «сенім телефоны» жұмыс істейді. Осы нөмірге байланысу арқылы салық төлеуші салықтан жалтарған салық төлеуші немесе салық қызметі органдары қызметкерлерінің әрекеті (әркетсіздігі) жайында хабарлай алады. Келіп түскен бірде бір мәлімет қараусыз қалмайды, соған сәйкес шаралар қолданылады.
Қызметкерлердің моралдық бет бейнесін көтеру үшін профилактикалық шаралар жүргізілуде. Қызметкерлер үнемі салық, әкімшілік және жемқорлыққа қарсы күрес заңнамалармен танысып отырады.
Жемқорлыққа қарсы күрес – бұл қоғамның біртұтас жұмысы. Тек ортақ күш-жігермен мемлекеттік қызметкер де салық төлеуші де оған қарсы тұрса, мемлекет қойған басты басымдық пен мәселені шешуге әбден болады.
Анар ЕСПОЛОВА, Астана қаласы Алматы ауданы бойынша салық басқармасының бөлім бастығы.