Газетіміздің өткен санында Қазақстан Республикасы Парламенті Сенатының Төрағасы Қайрат Мәми бастаған парламентшілер делегациясы ТМД ПАА Кеңесінің отырысына қатысуы барысында бірқатар кездесулер өткізгендігін жазғанбыз.
Кездесулер барысында Парламент Сенатының Төрағасы Қайрат Мәми Ресей Федерациясы Федералды Жиналысы Федерация Кеңесінің Төрайымы Валентина Матвиенко мен Ресей Федерациясы Федералды Жиналысы Мемлекеттік Думасының Төрағасы Борис Грызловпен кездесті. В.Матвиенкомен кездесу барысында Қ.Мәми ресейлік әріптесін осы ел парламенті жоғарғы палатасының басшылығына сайлануымен құттықтады әрі екі ел заң шығару органдары арасындағы қатынастардың жоғары деңгейі сақталып келе жатқандығын тілге тиек етті. Ресеймен қарым-қатынас Қазақстанның сыртқы саясатындағы басымдық болып табылады, дей келіп, Қайрат Мәми Қазақстан мен Ресей арасында екіжақты және көпжақты іс-қимылдардың келешегі зор екендігіне тоқталды. Сонымен қатар, Сенат Төрағасы Қазақстан Парламенті Сенаты мен Ресей Федералды Жиналысы Федерация Кеңесі арасындағы ынтымақтастық жөніндегі парламенттік топтың жұмысы нәтижелерін ерекше атады. Екі ел парламентшілері ТМД ПАА аясында белсенді әрекет етіп, Ассамблеяның халықаралық беделін көтеруде айтарлықтай күш салып келеді. Ресей Федерациясы Федералды Жиналысы Мемлекеттік Думасының Төрағасы Борис Грызловпен болған кездесуде Сенат Төрағасы Қайрат Мәми Ресей еліміздің стратегиялық әріптесі әрі тату көрші екендігін және осы елдегі қоғамдық-саяси оқиғаларға Қазақстанда ықыласпен назар аударып отырғандығын жеткізді. Мемлекеттік Думаның сайлауына айдан аз уақыт қалып тұр. Алдағы сайлауға әзірлікке байланысты ауқымды жұмыстардың күтіп тұрғанын қаперге салған Сенат Төрағасы «Единая Россия» партиясы Жоғары Кеңесінің Төрағасы Б.Грызловқа табысқа жетуіне тілектестігін білдірді.
Сонымен бірге, Сенат Төрағасы Қ.Мәмидің Тәжікстан Милли Маджилисінің Төрағасы М.Убайдуллоевпен кездесті. Онда Тәжікстан еліміздің маңызды әріптесі екені ерекше атап өтілді. Жоғары деңгейдегі кездесулердің жиі әрі тиімді жалғасын табуы екі ел арасындағы қарым-қатынастарды тереңдетіп келеді. Осы ретте М.Убайдуллоев Тәжікстанның мемлекетаралық байланыстардың барлық спектрі бойынша ықпалдастықтың кеңеюіне мүдделі екендігін ортаға салды. Сенат Төрағасы өз кезегінде парламентаралық ынтымақтастық екіжақты қарым-қатынастарды нығайтуда маңызды рөл атқарарымен бөлісті. Беларусь Республикасы Ұлттық жиналысы Республика кеңесінің Төрағасы А.Рубиновпен кездесуде Қ.Мәми аймақтық интеграцияны жылжыту мәселесінде қол жеткізген жетістіктерді жоғары бағалайтынын атап өтті.
Сенат Төрағасы Қ.Мәми бастаған қазақстандық парламентшілер Тәуелсіз Мемлекеттер Достастығына қатысушы мемлекеттердің Парламентаралық Ассамблеясы (ТМД ПАА) Кеңесінің отырысына қатысты. Күн тәртібінде жиырма мәселе талқыға салынды. Отырыс басталарда оған қатысушылар қазақстандық парламентшілерді бастап келген Сенат Төрағасын ТМД ПАА Кеңесіне мүше болуымен құттықтады. Парламентшілер отырыс барысында алдағы ТМД мен Парламентаралық Ассамблеяның 20 жылдығына дайындықты, сондай-ақ Л.Н.Гумилевтің туғанына 100 жыл толуына арналған шаралар барысын пысықтады. Мемлекеттік билік органдарының сайлауын байқауға ТМД ПАА өкілдерінің қатысуына қатысты мәселені талқылау барысында Қазақстан Парламенті Сенатының үстіміздегі жылдың тамыз айында өткен сайлауында халықаралық сайлау ережелері мен стандарттары сақталғандығы аталып өтілді. Сонымен қатар, отырыс барысында ТМД аясында қабылданған келісімдерді орындау, 2011-2015 жылдарға арналған үлгі заң шығармашылығы жоспары және ТМД ПАА алдындағы міндеттер жан-жақты көтерілді. Сондай-ақ, отырыс соңынан ТМД ПАА-ның ең жоғарғы марапаты саналатын «Содружество» орденімен бірқатар парламентшілер наградталды. Солардың ішінде Қазақстан Республикасы Мәжілісінің депутаты Тоқтарбай Қадамбаев та бар.
Қорытындысында Санкт-Петербург қаласында өткен ТМД ПАА Кеңесінің күн тәртібіне шығарылған мәселелердің барлығы да қолдау тапты. Осылайша ТМД ғұмыры ұзаққа бармайды деген кейбір сәуегейлердің болжамдары негізсіз екені осы отырыста анық байқалды. ТМД өзінің болашағы зор ұйым екенін тағы бір қырынан көрсетті.
Асқар ТҰРАПБАЙҰЛЫ.
Суретті түсірген Аманқұл ДҮЙСЕНБАЕВ.