Президент Нұрсұлтан Назарбаевтың «Тәуелсіздік дәуірі» атты кітабы – тарихи публицистика стилінде жазылған бірегей құжат. Елбасы кітапта тек жалаң факті мен цифрлар ғана келтірумен шектелмей, белгілі бір оқиғаларға өзінің бағасын беріп, сол кезде өзінің қандай сезімде болғанын сипаттайды.
Сонымен қатар «Тәуелсіздік дәуірінде» Нұрсұлтан Назарбаев әлем елдері көшбасшыларымен қалай кездескені туралы, олардың Қазақстан туралы не айтқанын есіне алып, мемлекетіміздің дамуына әлем көшбасшыларының қалай әсер еткенін жазады. Ерекше айтып өткім келгені, бұл кітапта Президент Қазақстанның жаңа тарихын үш жаңғыру кезеңінің призмасы арқылы қарастырады.
Өздеріңіз білетіндей, Қазақстанның үш жаңғыру кезеңі бар. Бірінші жаңғыру кезеңі 1990 жылдардың басында – 1991-1995 жылдары болды. 1996-1999 жылдар аралығы – екінші жаңғыру кезеңі. Бұл кезеңде Қазақстан нарықтық экономикаға көшіп, стратегиялық мақсаттар қойып, нақты жоспарлауға көшті. «Қазақстан-2030» Стартегиясы соның айғағы. Үшінші жаңғыру 2000 жылдары басталды. Бұл жылдары экономика дамыды, экономиканың барлық салалары өсті. Қазақстан халықаралық ұйымдарға мүше бола бастады. Бұл сыртқы саясаттағы үлкен жетістіктерімізге айналды. Қазір Қазақстан Президенті алдымызға жаңа міндеттер қойды. Оның бастысы – әлемнің ең дамыған 30 елінің қатарына қосылу. Міне, кітапта осының барлығы жан-жақты, кең ауқымда талданған.
Менің ойымша, кітап Қазақстанның жаңа тарихы туралы дайын оқулық. Бұл Президенттің барлық жастар мен студенттерге Тәуелсіздік күніне арнайы жасаған үлкен сыйлығы. Бұл оның жеке естеліктері, жазбалары, жетекші саясаткерлермен келіссөздері топтастырылған үлкен еңбек. Тәуелсіздіктің не екенін түсінгісі келген адам, тәуелсіздіктің нығаюын түсінгісі келген адам міндетті түрде осы кітапты оқуы керек деп ойлаймын.
Ғани НЫҒМЕТОВ, Еуразиялық интеграция институтының директоры