Қазақстан Республикасының Президенті Нұрсұлтан Назарбаев Қарағанды облысына жұмыс сапарының екінші күнінде іске қосылған жобалардың тұсауын кесті.
Елбасы Нұрсұлтан Назарбаевтың өндірісті аймаққа жұмыс сапарының жалғасы кеше Қарағандының жанында биылғы жазда ірге көтерген ауыл шаруашылығына арналған жеңіл ұшақтар шығаруды қолға алған «Сұңқар» ЖШС зауытында болудан басталды. Экономикалық әлеуеттің күшейгендігіне нақты айғақ ретіндегі бұл ірі жоба межеленген мерзімде жүзеге асырылған еді.
Бастапқы кезде кәсіпорын «Фермер 2», содан кейін «Фермер 500» аталатын ұшақтарды құрастырып, тапсырыстарға сәйкес санын ұлғайтуды көздейді. Бұлар агротехникалық шараларды жүргізуге, төтенше жағдайларда қолдануға, медициналық қызмет саласында көмек көрсетуге арналған ұшқыр әуе кемелері. Алдағы жылы «Сұңқар» атты төрт орындық түрі көк жүзінде самғаса, 10 орындыққа көшірілетін күн де алыс емес. Осындай ұшақтардың бір тиімділігі – басқаруға жеңіл. Оған кәдімгі автомобиль жанар майын пайдалануға болады. Арнаулы ұшу-қону жолағынсыз-ақ тегіс жер бетінен көтеріле береді. Мемлекет басшысына оның дайын үлгілерінің ұшып-қону техникалық көрсеткіштері көрсетілді.
Бұдан соң Нұрсұлтан Назарбаев облыстағы кәсіпорындарда атқарылған маңызды жобалардың телекөпір арқылы іске қосылу тұсаукесеріне қатысуға келді. Өңір өміріндегі осынау айтулы оқиғаға байланысты облыс әкімі Серік Ахметов сөз алып, Елбасыға аймақтағы әлеуметтік-экономикалық жағдай туралы кеңінен баян етті. Ортаға салынғанындай, тәуелсіздік жылдарында негізгі саладағы өнеркәсіптік әлеует сақталып қана қоймай, дамудың жаңа сатысына көтерілу жылдан-жылға нығайып келеді. 20 жыл ішінде жалпы өнім көлемі бұрынғы кезеңмен салыстыруға болмайтын деңгейде өсіп, былтыр 2 трлн. теңгені құраса, инвестиция үлесі де анағұрлым артты. Ол биыл 1,5 трлн. теңгеге жеткелі отыр. Соның ішінде өңдеуші секторға 600 млрд. теңге салынған. Үдемелі индустриялық-инновациялық даму бағдарламасын одан әрі тереңдету таяудағы уақытта оның көлемін 30 пайызға ұлғайтуға ықпал етпек. Индустрияландыру картасына енгізілген аймақ үшін айрықша маңызды 50 жоба жергілікті экономикаға 300 млрд. теңге қамтып, 5 мың жұмыс орнын ашуға мүмкіндік бергендігі аталды.
Мемлекет басшысының тапсырмасына сәйкес өңір өндірісіне тың серпін жасайтын екі инновациялық жобаны іске асыру жалғастырылуда. Технологиялық газды тазарту және метан газын залалсыздандыру бойынша өндірістік құрал-жабдықтар дайындалып жатыр. Арнаулы экономикалық аймақ құру жобасы үлкен өзгерістер күттіреді. Бұл шараның басым бағыты металлургиялық сала, мәшине жасау кешені, химия өнеркәсібі, құрылыс материалдары өндірісі болады. Қазірдің өзінде 10 инвестор аталған жобаға атсалысуға дайын. «Бүгін Сіздің тікелей қатысуыңызбен 7 жаңа өндірістің іске қосылуы торқалы той алдындағы толайым табыстардың бір парасы», деп түйінделген аймақ басшысының есебінен соң, осы жобаларды іске асырған кәсіпорындар еңбеккерлері телекөпірге қосылды.
Оған алдымен «Қарағандыэнергоорталық» ЖШС 3 жылу-электр орталығының ұжым мүшелері шықты. Мұнда жаңа турбогенератор салынып, жобалық қуаты 157 МВТ пен 185 Гкалл/сағатқа жеткізілген. Бұл энергетикалық және жылу қуатын өндіруді барынша кеңейтуге мүмкіндік жасайды. Сонымен бірге, ол таратылатын аймақта қуат тапшылығын төмендетуге де тиімді әсер етеді. Президенттен аталған өндіріс буынының іске қосылуына рұқсат берілуі сұралғаннан соң нысан бірден жұмысқа кірісті. Серіктестік еңбеккерлері Елбасының өзі оған дем беруін зор қуанышпен қабылдады. «Аса қадірлі Нұрсұлтан Әбішұлы. Жоғары оқу орнын бітірген соң осында еңбек етіп келемін. Еліміздегі өркенді өзгерістердің жарқын бір нышаны біздің кәсіпорын тынысынан да танылады. Алдағы уақытта өміріміздің одан сайын нұрлана түсуіне сеніміміз үлкен. Осының бәрі Сіздің көреген басшылығыңыздың арқасында деп білеміз», деді жас жұмысшы Төлеухан Дуанбеков.
Келесі кезекте Ақтас кентінде телекоммуникациялық кабель шығаратын «Кэлсис» ЖШС-ның осы өнімінің тұсауы кесілді. Ол белгі беру сапасын жақсартуға арналған және интернет жылдамдығын күшейтеді.
Елбасы содан кейін Бұқар жырау ауданының Үштөбе ауылындағы жаңадан жаңғыртылған құс фабрикасы ұжымы мүшелерімен теледидар арқылы жүздесіп, еңбектеріне табыс тіледі. Бұл кәсіпорынның тұтынушыларға жылына 110 миллион жұмыртқа жөнелтуге мүмкіндігі бар.
Облыста Мемлекет басшысының балабақшалардағы орынның жетіспеушілігі мәселесін шешу тапсырмасына байланысты олардың құрылысын жеделдете жүргізу үшін бар мүмкіндіктерді пайдалануға баса көңіл бөлінуде. Бүгінде бүлдіршіндердің 80 пайызы мектеп жасына дейінгі мекемелермен қамтылған. Алдағы үш жылда жеткіншектердің бәрі аялы қамқорлыққа бөлене алады. Бұл ретте мемлекеттік-жекеменшік әріптестігі шеңберінде түріктің «7 Pіrаmіt» компаниясымен жасалған концессиялық жоба бойынша Қарағанды қаласында әрқайсысы 320 орындық 11 балабақша салынады. Мұның өзі 3 пен 6 жас аралығындағы жеткіншектер үшін 3500 орынның ашылуына жағдай жасайды. Осы жөнінде Нұрсұлтан Әбішұлына аталған компанияның басшысы Олу Мұстафа мәлім етті. Елбасы бұл жобаға сәттілік тіледі.
Бүгінде жергілікті кәсіпорындардың бірқатары бұған дейін өндіріліп көрмеген өнімдерді шығаруға ынта танытуда. «Арселор Миттал Теміртау» АҚ темір жолдарға арналған рельстер жасауды қолға алғаны осы телекөпір кезінде мәлім болды. Оған көптеп тапсырыс беруге «Қазақстан темір жолы» АҚ тарапынан ынта танытылып, осыған байланысты меморандумға қол қойылды.
Нұрсұлтан Назарбаев телекөпір арқылы жүздесуге, кездесуге қатысушылар алдындағы өз сөзінде үдемелі индустриялық-инновациялық даму бағдарламасы аясында елімізде іске асырылған жобалардың отандық экономикаға үлкен серпін туғызғандығына тоқталды. Соларды жетілдіре түсіп, өркендеу жолын одан сайын өрістету мемлекеттік басым бағыт болып қала береді. Бәсекеге қабілетті өндіріс қуат-қабілетін күшейту – қазақстандық экономика кемел келешегінің кепілі. Жыл сайынғы 7 пайыздық орнықты дамуға қол жеткізілді. Бұл әлем елдерінің қазіргі жағдайымен салыстырғанда ең алдыңғы қатарлы көрсеткіштің бірінен саналады. Мемлекет басшысы отандық өндірістің алып ошағы – Жезқазған аймағының әлеуметтік-экономикалық жағдайы арнайы бағдарлама бойынша жақсара түспектігін атап өтті. Бұл хабар жылы қабылданды.
Елбасы жұртшылық өкілдерімен әңгімеден соң бұқаралық ақпарат құралдарына берген сұхбатында былай деді: «Ел Тәуелсіздігінің 20 жылдығы мерекесі қарсаңында өңірлерді аралап, іске асырылып жатқан үдемелі индустриялық-инновациялық бағдарламаның орындалуы барысын тексеріп жүргенімді білесіздер. Міне, бұл жолы Қарағанды облысына келдік. Қазақстанда биыл 234 жаңа өндіріс ашылды. Тағы да 122-сі жұмысын бастағалы тұр. Сөйтіп, 44 мың жұмыс орны құрылатын болады. Мұны көптеген отбасының қуанышы санаймын.
Экономиканы дамытуға бағытталған жұмысты жалғастыра береміз. Соның ішінде елімізде ешқашан болып көрмеген өндірістер құрылып жатыр. Қарағандыда тұңғыш авиация зауыты ірге көтерді. Бұған дейін ұшақ жасалған жоқ еді. Бұрынғы Ан-2 ұшағы қазір қолдануға жарамсыз. Бұлар соларды алмастырады. Тікұшақ құрастыратын зауыттар да пайда болады.
Қарағанды – еліміздегі ең өндірісті аймақ. Домна пеші, болат құю, басқа да ірі жобалар іске асырылды. Мектептер, ауруханалар, спорт кешендері салынуда. Осының бәрі менің тапсырмам бойынша халық игілігіне арналып атқарылудағы істер. Бұлар «Нұр Отан» ХДП-ның да бағдарламасына сәйкес жасалып жатқан жұмыстар.
Демек, ел қуаты артып, тұрмыс жақсара беретін болады».
Бұдан соң Нұрсұлтан Назарбаев Бұқар жырау даңғылы бойындағы алаңда тұрғызылған биіктігі 47 метр, ұшар басында алтын қаптырмамен апталған қыран құс бейнесі сомдалған Тәуелсіздік монументінің ашылу салтанатына қатысты. Қала, аймақ тарихына жарқын бет болып қосылар оқиға қуанышын бөлісуге қауышқан жұртшылық өкілдері, еңбегі мен есімі елеулі қауым, болашаққа сенімдері берік жастар Тұңғыш Президентті ыстық көңілмен, сүйіспеншілік сезіммен қарсы алды.
Осы жерде бұрын кешегі кеңестік жүйе көсемінің ескерткіші тұрушы еді. Уақыттан артық төреші жоқ. Келмеске кеткен күнмен бірге ол да кетті ақыры. Тәуелсіздіктің қиын жолын жеңген, жемісін татқан халықтың оның алынып тасталуы, орнына жаңарған өмірге жарасты белгі орнатылуы тілегі орындалды.
Айқын НЕСІПБАЙ.
Қарағанды.
-----------------------------------------
Суреттерді түсіргендер С.БОНДАРЕНКО, Б.ОТАРБАЕВ.