Қарап отырсам, өткен ғасырдың 1991 жылы, оның өзінде желтоқсан айы еліміз жаңа тарихында алтын беттер болып жазылып қалған оқиғаларға толы болыпты. Жыл басынан-ақ Кеңес Одағы кеңістігінде бұрын-соңды естіліп-көрілмеген өзгерістер дүмпуі шындығын айтқанда, көңілімізді әртүрлі ойларға қобалжытып, аса алаңдаушылық туғызған еді. Арты болжаусыз алмағайып кезеңнің неге апарып соқтырары күн сайынғы бұралаңдардан тіпті үрей үйелететін. Осындай шақта республика басшысы Н.Ә. Назарбаевтың ұстамды, байсалды саясаты медет болмағанда қандай жағдайға ұшырарымызды еске алу ауыр. Бар үмітіміз бен сеніміміз ел халқы алдында беделі өте-мөте биік Нұрсұлтан Әбішұлы болғандығы шындық. Металлургтер ортасында шыңдалып өсіп, қайратқа қайралған қасиетін жақсы білетіндіктен қиындықтан алып шығатындығына мен өзім әсіресе, берік сендім.Сондықтан сол кездегі Жоғары Кеңес депутаттарының президентікке Нұрсұлтан Назарбаевтың кандидатурасын ұсынуын қуана қарсы алдым. Халықтың түгелі қатысуы арқылы сайлануға түсу дұрыс шешім деп қабылдадым.
Дауыс беру күні сайлау учаскесіне ерте бардым. Солай болса да оның алды жұртқа лық толып қалыпты. Бәрінің де ой-ниеті бірдей екені жарқын жүздерінен айтылмай-ақ аңғарылды. «Өзіміздің Нұрсұлтанымызға. Өзіміздің Назарбаевымызға дауыс береміз!» деп жаңғырыққан дауыстар осы күнге дейін құлағымнан кетпейді. Кейіннен білгенімдей теміртаулықтардың 99 пайызы жақтап дауыс беріпті. Мұндай бірауыздылық кейінгі сайлауларға да тән болды. Бұл халықтың Тұңғыш Президентіне деген шексіз сүйіспеншілігі дей аламын.
Теміртауымыз жылдан-жылға көркейіп, өркендеу үстінде. Жақында Нұрсұлтан Әбішұлы жұмыс сапарымен қаламызда, өзі еңбек еткен металлургиялық комбинатта болып, жаңарулармен тікелей танысты. Оған сүйініштілігін білдірді. Жолымызды жалғастырған жастардың жалынды істеріне қуаныштымыз.
Арғын ЖҮНІСОВ, Қазақстанның Еңбек Ері.
Теміртау.