Орталық сайлау комиссиясының хабары
Бұл хабар газеттің 1991 жылдың 7 желтоқсандағы нөмірінде жарияланыпты. Онда былай делінген:
«Қазақ КСР Жоғарғы Кеңесінің 1991 жылғы қазанның 16-сындағы қаулысына сәйкес 1991 жылғы желтоқсанның 1-інде Қазақ КСР Президентін сайлау болды.
Қазақ КСР Президентін сайлаудың нәтижелері туралы оругтік сайлау комиссияларынан жолданған протоколдарды қарап, Қазақ КСР Президентін сайлау жөніндегі Орталық сайлау комиссиясы мынаны хабарлайды:
Республика территориясында құрылған 21 сайлау округі бойынша сайлаушылар тізіміне 9 961 242 азамат енгізілді. Дауыс беруге олардың 8 788 726-сы, яғни 88, 23 проценті қатысты.
Жасырын дауыс беру үшін сайлау бюллетеніне Қазақ КСР Президентіне үміткер Н.Ә.Назарбаев пен Қазақ КСР вице-президентіне үміткер Е.М.Асанбаев енгізілді.
Сайлаудың нәтижесінде Н.Ә.Назарбаевты жақтап 8 681 276 сайлаушы, яғни дауыс беруге қатысқандар санының 98, 78 проценті дауыс берді.
Қазақ КСР Президентіне үміткер Н.Ә.Назарбаевтың фамилиясы сызылған сайлау бюллетеньдерінің саны 107 252, яғни қолға берілген бюллетеньдер санының 1,22 проценті. 198 сайлау бюллетені жарамсыз деп танылды.
Республиканың сайлау округтері бойынша дауыс берудің нәтижесі төмендегі деректермен сипатталады».
Мұнан кейін сайлау округтері бойынша сайлаушылардың тізімі мен дауыс беруге қатысқан азаматтардың саны, берілген дауыстар саны туралы арнайы кесте берілген. Оның қорытындысында «Орталық сайлау комиссиясы «Қазақ КСР Президентін сайлау туралы» Заңның 21-статьясына сәйкес және дауыс берудің қорытындылары негізінде дауыс беруге қатысқан сайлаушылардың 98,78 процент дауысын алған Нұрсұлтан Әбішұлы Назарбаевты Қазақ КСР Президенті болып сайланды деп таныды. Президентпен бірге Ерік Мағзұмұлы Асанбаев Қазақ КСР вице-президенті болып сайланды деп есептеледі» делініпті.