«Бәріміз үшін жеңіс ортақ!» деп аталатын халықаралық медиа-экпедиция Қазақстанда бірінші болып Петропавл қаласына аялдады.
Автошеруді Ханты-Манси автономия округі думасы жанындағы жастар парламенті мен «Юграның жас журналистері» аймақтық қоғамдық ұйымы ұйымдастырды. Құрамында әртүрлі маркалы көліктер мен 30-ға жуық мүшелері бар экспедиция Украина, Беларусь, бірқатар Еуропа елдерін аралап өтіпті. Олар облыс орталығындағы «Мәңгілік от» алауына, Жеңіс мемориалына, 314 атқыштар дивизиясы ескерткішіне гүл шоқтарын қойып, тағзым етті. Бұдан кейін тарихи-өлкетану музейінде аға және жас буын өкілдерімен кездесті.
«Сапар мақсаты Қазақстанда тұратын соғыс, тыл ардагерлерінің өмірлерімен, майдан даласындағы ерлік істерімен, жанқиярлық еңбек жолдарымен жақынырақ танысу, құнды ақпараттар жинау, екі ел жастары арасында берік ынтымақтастық орнату», дейді халықаралық медиа-экспедицияның жетекшісі, жастар парламентінің мүшесі Николай Заболотнев.
Оның айтуынша жинақталған ақпараттар әлеуметтік желілер арқылы да жұртшылыққа таратылады.
Кездесуден кейін Ханты-Манси автономия округі думасы жанындағы жастар парламенті мен облыстық жастар ұйымы «Бәріміз үшін жеңіс– ортақ!» халықаралық медиа-экспедицияға бірлесіп қатысу туралы меморандумға қол қойды.
Өмір Есқали
«Егемен Қазақстан»
Солтүстік Қазақстан облысы