Жасыратын несі бар, Тәуелсіздіктің алғашқы жылдарында ел ерге, ер жерге қараған заман болған. Бір қоғамдық формациядан екіншісіне аяқ басып, елең-алаң заманда азаттығын алған Қазақстанның болашақ бағытының бұлыңғыр болғаны да тарихи шындық. Осындай сәтте мемлекет тізгінін қолына алған Елбасы Нұрсұлтан Әбішұлы Назарбаев елді адастырмай, тар жол, тайғақ кешуде қалдырмай, тұмсықтыға шоқыттырмай, тырнақты мен азулыға талатпай сындарлы сәттен аман алып шықты. Аман алып шықты деген әншейін сөз. Еңсесі биік елдердің қатарына жетелеп жүріп қосты.
Айтуға оңай шығар. Бірақ тығырықтан шығар жолды табу оңай шаруаның қатарынан емес. Күлтегін жазуларында айтылатындай, Елбасы «күн отырмады, түн ұйықтамады». Қазақстанды әлемнің алдыңғы қатарлы елдерінің қатарына қосу үшін, елінің өркенді өзгерістерге жетуі үшін, халқының бай-бақуатты өмір сүруі үшін бойындағы бар қажыр-қайратын, білімі мен білігін, іскерлігін, ұйымдастырушылық қабілетін, көрегендігін, көсемдігін жұмсады. Ел ісінде Елбасының аянып қалған кезі жоқ.
Азаттықтың алғашқы жылдарында-ақ Семей полигонын жауып, қолдағы қуатты атом арсеналынан бас тартып, бейбіт жолдың даңғылын салуы Елбасының көреген шешімдерінің бірегейі еді. Ол кісі осы арқылы әлемді бейбітшілікке шақырды. Сол сара жолынан әлі күнге бір мысқалға да тайған емес. Елімізде әртүрлі дін өкілдерінің бас қосуы, мемлекетімізді мекен еткен 130 ұлт пен ұлыстың тату-тәтті өмір сүріп жатуы, Еуропадағы қауіпсіздік және ынтымақтастық ұйымына төрағалығымыз, Астана Саммитінің өтуі Елбасының дара саясатының арқасы. Әлем Назарбаевтай көшбасшының сөзіне құлақ түреді. Ол кісімен санасады. Сол арқылы Қазақстанды да құрметтейді.
Нұрсұлтан Әбішұлы Назарбаев табиғатынан қаһарман адам. Қазақстанды қуатты мемлекетке айналдырғаны да осы қаһармандығы дер едім. Ел Елбасының қаһармандығын баяғыдан айтып келеді. Ал Тәуелсіздіктің 20 жылдығы қарсаңында Елбасыға «Халық Қаһарманы» атағының берілуі – халықтың қалауы. Бұл – өте әділетті әрі тарихи шешім.
Дариха АҚМАҒАНБЕТОВА, «Қызылорда облыстық Азаматтық альянс» қауымдастығының төрайымы.