Елбасымыз Нұрсұлтан Назарбаевты «Халық Қаһарманы» атағына ұсыну жөніндегі қалалық ардагерлер кеңесінің атынан жазылған ақ ниет хаттан жақсы хабар күтушілердің бірімін. Мұндай тілектер талай болған. Басымыздан көп жағдайларды кешкен, қоғамдық, мемлекеттік жүйенің ауысқанын көрген, ондағы сан қилы бұралаң белдерден өткен біз үшін атақ-даңқтың мазмұны да өзгеріңкіреп бара жатқандай болған. Әдетте, мемлекет басқарған адамның үш-төрттен алтын жұлдыз тағуы қалыпты нәрсе сияқты еді.
Біздің қасиетті Тәуелсіздігіміз барлық саладағы еркін желпініспен қатар, өмір мағынасына баланар ар-ұждан құндылығын кәдуілгі таза деңгейге көтеруімен қымбат. Бұл жөнінде Тұңғыш Президентіміз, Отанының аяулы перзенті Нұрсұлтан Әбішұлы Назарбаев өрелі өнеге таныта білді. Таққа адал отырудың талай белесінен өтті, жаңа тұрпатты сайлаулар мен жалпыхалықтық референдумдарға өзі бастамашы болды. Халықтың еркіне ерік беріп, әлем талпынып келе жатқан демократия ұстындарын бекітті. Атаққұмарлау халық атақты ақтай білудің, еңбек сіңірудің, оны жарқыратып тағып жүрудің жауапкершілігін осыдан-ақ аңғарады.
Мемлекеттік марапат – адам өміріндегі айрықша оқиға. Оның астарында үнемі мақтанышқа бөлейтін қуаныш бар. Еліміз арманы Тәуелсіздігіміздің жиырмасыншы белесіне шықты. Алқынбай, абыроймен шықты. Жетістіктеріміз жүректі жылытып, болашағымызға алаңдамайтын болдық. Міне, адам баласы үшін, біздің сүйікті Президентіміз үшін осыдан артық бақыт жоқ деп есептеймін. Халық тілегін Үкімет қолдап, Парламент заңдастырғанына шексіз қуаныштымын. Ардақты Елбасымызға, Ұлт көшбасшысына зор денсаулық, Отан игілігі жолындағы ерен еңбегіңіз жемісті болсын деген тілегімді жеткізгім келеді.
Айдос ӘБУТӘЛІПҰЛЫ, еңбек ардагері.
Ақмола облысы.