Астанадағы Назарбаев университетінде еліміз Тәуелсіздігінің 20 жылдығына орай студенттер арасында пікірсайыс болып өтті. Оған қаланың барлық жоғары оқу орындарының студенттері қатысып, саяси және экономикалық, мәдени, тарихи және басқа да тақырыптар бойынша ой жарыстырды.
Пікірсайыс екі лига болып өткізілді. Біріншісі – ағылшын, екіншісі – орыс лигасына қатысқан студенттер арасында Назарбаев университеті мен Л.Н.Гумилев атындағы ЕҰУ-дің өкілдері бас жүлдені жеңіп алды. Ал пікірсайыстың ең үздік спикері болып Назарбаев университетінің студенті Жәмила Жақсыбаева атанды. Сондай-ақ, ол ағылшын лигасында өзімен бірге оқитын Қоғам және ғылым мектебінің 1-курс студенті Әлібек Нұркешпен бірге бірінші орынды жеңіп алды. Ал орыс лигасында Еуразия университетінің студенті Бақтияр Сулфин бірінші орынға ие болды.
Қазір жарыстар ағылшын және орыс тілдерінде өтіп жатқанымен, болашақта қазақ лигасын құру жоспарлануда. Ол істі жүзеге асыруға қазақ студенттерінің тобы атсалысуда.
Дастан КЕНЖАЛИН.