«Ұстаздық еткен жалықпас, үйретуден балаға» деп ұлы Абай айтқандай, бүгінгі ұстаздар үнемі өз білімдерін жетілдіріп отыруға, жаңа технологияларды игеруге міндетті. Өйткені, заман талабына сай, бәсекеге қабілетті оқушылар тәрбиелеп шығару тек кәсіби білігі жоғары ұстаздар қолынан ғана келетін іс екені хақ.
Бүгінгі күні ғылым мен білімге қойылар талап артып, ұстазға жүктелер міндет еселенуде. Сондықтан ұстаздар қауымының да қарап қалар реті жоқ. Соның айқын дәлелелі – ұстаздардың ұстазы Ұлжалғас Есназарованың еңбегі. Ол – Қазақстанның еңбек сіңірген қайраткері, педагогика ғылымдарының докторы, профессор, Географиялық атаулы мектеп жетекшісі.
Бүгінде атаулы мектеп 20 жылдық белестен аттады. Бұл мерейтой еліміз тәуелсіздігінің 20 жылдығымен тұспа-тұс келді. Осы жылдар ішінде мектептің ұйымдастыруымен көптеген семинарлар өтіп, еліміздің табиғаты тамаша жерлеріне саяхат жасалып, оқушыларға арналған ондаған кітаптар жарық көрді. Осыдан шамалы уақыт бұрын «Туған жер географиясы және мектептегі өлкетану жұмысын ұйымдастырудың ғылыми негіздері» тақырыбында Маңғыстау облысының орталығы – Ақтау қаласындағы Маңғыстау білім беру ұйымдары қызметкерлерінің біліктілігін арттыру институтында республикалық ғылыми-әдістемелік семинар өтті. Семинар атаулы мектептің жетекшілігімен жүзеге асты. Өңірдің табиғаты ерекше жерлеріне саяхат жасалып, жер бетінен 132 метр төмен жатқан Қарақия ойысында болудың сәті түсті.
Осы жолғы семинарға республикамыздың түкпір-түкпірінен атаулы мектеп мүшелері, жалпы саны 40 ұстаз қатысты. Қаламыздағы 100 жылдық тарихы бар Жамбыл Жабаев атындағы №4 мектеп-гимназиясының директоры Базаркүл Сыздықова да Ақтауға Астанадан арнайы барған бір топ ұстаздың қатарын толықтырды. Ал ұстаздар семинар барысында әріптестерімен өз іс-тәжірибелерін бөлісті.
Жалпы, Ақтауда өткен семинардың үйретері көп, берер тағылымы мол болды. Республикалық ғылыми-әдістемелік жұмыстар мәнділігімен есте қалды.
Жансұлу БАЗАРБАЕВА, №4 мектеп-гимназияның география пәнінен жоғары санатты мұғалімі.
Астана.