Республика Тәуелсіздігінің 20 жылдығын тойлау қарсаңында Президенттің 2011 жылдың 27 қаңтарындағы №1144 Жарлығымен 2011 жылдың 8 желтоқсаны «Шаңырақ» күні деп белгіленген. «Қазақстанның тұрғын үй құрылыс жинақ банкі» аталмыш шараны жүргізуге белсенді қатысуда. 2011-2014 жылдарға арналған тұрғын үй құрылысы бағдарламасын жүзеге асыру нәтижесі мен жүргізілетін шаралар туралы жан-жақты «Қазақстанның тұрғын үй құрылыс жинақ банкі» АҚ басқарма төрайымы Нұрбибі Серекхажықызы НАУРЫЗБАЕВА әңгімелейді.
– Үстіміздегі жылдың басында 2011-2014 жылдарға арналған жаңа тұрғын үй құрылысы бағдарламасы басталды. Бағдарламаның негізгі операторы «Қазақстанның тұрғын үй құрылыс жинақ банкі» АҚ жергілікті атқару органдарымен бірге аталмыш бағдарламаның орындалуын жүзеге асырады. Нұрбибі Серекхажықызы, 2011-2014 жылдарға арналған тұрғын үй құрылысы бағдарламасы туралы айтып өтсеңіз?
– 2011-2014 жылдарға арналған Қазақстан Республикасындағы тұрғын үй құрылысы бағдарламасы (бұдан әрі – Бағдарлама) Қазақстан Республикасы Үкіметінің 31.03.2011 жылғы №329 қаулысымен бекітілген, бағдарламада екі бағытты жүзеге асыру көзделген, атап айтқанда:
1) Қазақстан облыстарының, Астана және Алматы қалаларының жергілікті атқару органдарының (бұдан әрі – ЖАО) тұрғын үй құрылыс жинақ (ТҚЖ) жүйесіне қатысушылар үшін тұрғын үй салуы;
2) жеке меншік үй салушылар арқылы салынатын тұрғын үйлердің құрылысын қаржыландыру үшін екінші деңгейлі банктерді (бұдан әрі – ЕДБ) қорландыру.
Халықтың ауқымды бөлігіне тұрғын үйдің қолжетімді болуын қамтамасыз ететін тұрғын үй құрылысын дамыту проблемаларын кешенді түрде шешу Бағдарламаның негізгі мақсаты болып табылады.
Бағдарлама аясындағы бірінші бағыт шеңберінде жергілікті атқару органдарына 2011-2013 жылдары тұрғын үй салуға республикалық бюджеттен 80,84 млрд. теңге бөлінеді, оны «Қазақстанның тұрғын үй құрылыс жинақ банкі» АҚ қазіргі және жаңа салымшыларына кредиттер беру арқылы жүзеге асыратын болады.
Тұрғын үй құрылысының жобалары алдын ала Банк пен жергілікті атқару органдары арасында келісіледі. Салынған тұрғын үйге қойылатын белгілі бір талаптар көзделген, бірінші кезекте тұрғын үй 3 сыныпты жайлылыққа сәйкес келуі керек, мұнымен қатар әр шаршы метр үшін бағасы «таза әрленген» 1 шаршы метр үшін Бағдарламада көзделген шектеулі бағадан аспауы тиіс: Алматы қаласы үшін 142 500 теңге, Астана, Ақтау, Атырау және Өскемен қалалары үшін – 112 500 теңге, басқа облыс орталықтары үшін – 90 мың теңге.
Тұрғын үй сатып алушылардың пулына қатысудағы басты артықшылық – салымшы үшін құрылыс компаниясының қызметімен байланысты ешқандай тәуекелдің болмауы, себебі, салымшының жинақтары құрылыс мақсаттарына жұмсалмайды, құрылыс мерзімі аяқталғанға және сатып-алу шартына қол қойылғанға дейін өзінің жинақ шотында сақталады.
Өтініштерді қабылдау аяқталғаннан кейін (берілген өтініштер саны пулдағы пәтерлер санынан аз болған жағдайда ғана өтініш қабылдау мерзімі ұзартылуы мүмкін), барлық салымшылар бойынша жинақтау мерзіміне, шарт сомасына, жинақталған сомаға, ақшаның қашаннан бері салынып келе жатқанына (бұл шарт бойынша бағалау көрсеткішіне әсер етеді) тәуелді түрде олардың жалпы балл саны есептеледі. Рәсімдердің ретімен және есептеу механизмімен неғұрлым толығырақ Банктің www.hcsbk.kz сайтындағы «Салынып жатқан тұрғын үйді сатып алу» бөлімінде тұрғын үй құрылыс жинақ жүйесі арқылы тұрғын үй сатып алушылардың пулын қалыптастыру ережелері арқылы танысуға болады.
Егер, алдын ала қол жеткен табыстар туралы айта кететін болсақ, аталған бағытта Банкте 2011 жылы барлық облыс әкімдіктерімен тұрғын үй құрылыс жинақ жүйесіне қатысушылары үшін жалпы ауданы 335 мың шаршы метр 5 690 пәтерді құрайтын 31 тұрғын үй кешенін салуға келісімдер жасалды.
2011 жылғы 1 желтоқсандағы жағдай бойынша Банкте 4 853 пәтерді сатып алуға Банк салымшыларының пулдары ашылды және құрылды (2 488 пәтерге 3 745 Банк салымшылары өтініш берді). Қалған 2 365 пәтерге пул құру әлі жүргізілу үстінде.
Бағдарламаның екінші бағыты аясында мемлекет екінші деңгейлі банктерді қорландырады және құрылыс компаниялары үшін олардың кредиттерін жылдық 12% аспайтын мөлшерлемеге дейін арзандатады, мұндай жағдайда, «таза» әрленген тұрғын үйдің 1 (бір) шаршы метрінің құны 170 000 теңгеден аспайды (сейсмикалық коэффициенті ескерілген).
Бағдарламаның аталған бағытында жүзеге асырудың мынадай схемасы көзделеді: екінші деңгейлі банк көрсетілген талаптарда кредит беруге дайын болған жағдайда, онымен Тұрғын үй құрылыс жинақ банкі арасында мақсатты жедел салым шартына қол қойылады, оның талаптары бойынша қажет соманың 50%-ы екінші деңгейлі банк қаражаттарынан алынады, ал қалған 50%-ы жылдық 3%-бен 5 жыл мерзімді депозит түрінде Тұрғын үй құрылыс жинақ банкінен түседі.
Бұл құрылыс компаниялары үшін кредит беру мөлшерлемесін және соңғы өзіндік құн мен дайын үйдің сатылу бағасын төмендетуге мүмкіндік береді.
Қаржыландырудың көрсетілген схемасы құрылысты аяқтау үшін де, тұрғын үй нысандарының жаңа құрылысын салу үшін де қолданылады.
Бағдарламаның аталған бағыты бойынша кредит беру Астана қ. «Жағалау-3» ТК («Банк ЦентрКредит» АҚ) және Астана қ. «Монблан» ТК («БТА Банк» АҚ) жалғасуда.
– Бұл бағдарламаның бұрынғы мемлекеттік бағдарламалардан айырмашылығы неде?
– Бірінші кезекте атап өтетін жай – тұрғын үй құрылысы бағдарламасын жасау қазақстандықтардың баспана мәселесін шешуге бағытталған. Бұрынғы мемлекеттік тұрғын үй құрылыс бағдарламалары бюджет саласы, мемлекеттік кәсіпорын қызметкерлері және жас отбасылардың баспана мұқтаждығын шешуге бағытталған болатын. Яғни, халықтың баспанаға аса зәру санатынан. Ал, қазіргі тұрғын үй құрылыс бағдарламасына Қазақстанның барлық азаматтары қатыса алады. Ең бастысы – Банк салымшысы болып, тұрғын үй құрылыс жинағы туралы шарт жасау.
– Банктің «Шаңырақ» күніне қатысуы туралы айтып берсеңіз? Қандай іс-шаралар жасалмақ?
– Республика Тәуелсіздігінің 20 жылдығын тойлау қарсаңында, яғни, 20 күнтізбелік күн ішінде – «Тәуелсіздіктің 20 шыңы» айдары бойынша Президенттің Жарлығымен 2011 жылдың 8 желтоқсаны «Шаңырақ» күні деп аталған. «Шаңырақ» күнін өткізудің мақсаты – Қазақстанның тұрғын үй құрылысы бойынша жеткен жетістіктерін насихаттау.
«Қазақстанның тұрғын үй құрылыс жинақ банкі» АҚ» бұл іс-шараны өткізуге белсенді түрде қатысады.
8 желтоқсан мен 15 желтоқсан аралығында Банктің облыстық филиалдарында, Алматы қалалық филиалдарында және қызмет көрсету орталықтарында «Ашық есік күндері» өтпек. Сонымен қатар осы шаралар өтетін кезеңде Астана, Алматы қалаларының кейбір кәсіпорындарында және облыстық орталықтарда Банк қызметкерлері шығып Қазақстандағы 2011-2014 жылдарға арналған тұрғын үй құрылысы бағдарламасын жүзеге асыру шарттарын, Банк қызметтері түрлерін таныстыру жұмыстарын жүргізеді.
Банк серіктестері «Қазақстан Халық банкі» АҚ және «Қазпошта» АҚ-тың кейбір аймақтық бөлімшелерінде «тұрғын үй құрылыс жинақ аптасы» дәстүрлі акциясы өтеді. Онда Банк мамандары сұрақтарға жауап береді, түсініктемелер жүргізеді, қажетті есептеулерді жасап, ТҚЖЖ шарттарын жасайды.
Ең бастысы, «Қазақстанның тұрғын үй құрылыс жинақ банкі» 8-15 желтоқсан аралығында Қазақстан Республикасы Тәуелсіздігінің 20 жылдығына орай акция жүргізеді. Акция бойынша тұрғын үй құрылыс жинағына шарт жасаушы салымшыға комиссиялық төлемге 20% жеңілдік қарастырылып отыр.
– Нұрбибі Серекхажықызы, «Қазақстанның тұрғын үй құрылыс жинақ банкі»АҚ Қазақстанның банк жүйесінде 8 жыл жұмыс істеуі барысында өзін тұрақты болашағы бар қаржылық институт ретінде көрсете білгені ешкімге құпия емес. Банктің ағымды жылдағы жалпы көрсеткіштерін айтып өтсеңіз?
– Бүгінгі күнде тұрғын үй құрылыс жинақ жүйесіне қатысушылар саны 267 мыңнан асады, жасалған тұрғын үй құрылыс жинақ шарттарының сомасы 487 млрд. теңгеден артық. «Қазақстан тұрғын үй құрылыс жинақ банкі» АҚ қызметінің нәтижесі туралы айтар болсақ, жалпы, 2011 жылы тұрғын үй құрылыс жинақ жүйесіне қатысушылар саны айтарлықтай ұлғайды. Тек осы ағымдағы жылдың ішінде 53 мыңға жуық жаңа қатысушылар келді, ол былтырғы жылдың көрсеткішінен 18% артық, жасалған тұрғын үй құрылыс жинақ шарттарының сомасы 121 млрд. теңгені құрады, бұл былтырғы жылдың осы уақытымен салыстырғанда 29% артық.
Банк клиенттерінің қаражаттары жыл басынан бері 55%-ға өсті және 61 млрд. теңгені құрады (өткен жылғы осындай кезеңмен салыстырғанда өсу қарқыны 36% құрады).
Кредиттік қоржын жыл басынан бері 18% өсті және 80 млрд. теңге көрсеткішіне жетті.
Жыл басынан бері Банк ЕДБ арасында активтер мөлшері бойынша 16-дан 15-ші орынға, меншікті капитал мөлшері бойынша 11-ден 3-ші орынға, жұртшылықтың ұзақ мерзімді салымдары бойынша 7-ден 5-ші орынға көтерілді.
– Банктің даму жоспары, басымдықтары мен 2012 жылға деген жоспарлары қандай?
– Банк 2012 жылы халықтың тұрғын үй құрылыс жинақ жүйесіне қатысу үлесін арттыруды, Банктің теңгемен ұзақ мерзімді салымдар нарығындағы және тұрғын үй салу және жүзеге асыруға кредит берудегі үлесін ұлғайтуды жоспарлап отыр.
Бұл аталған жоспарлы көрсеткіштерді орындау мақсатында 2012 жылы 81,4 мың тұрғын үй құрылыс жинақ жүйесіне жаңадан қатысушыларды тартуды (бұл 2011 жылғы жоспарлы көрсеткіштерден 18% артық), жұртшылыққа 32,0 млрд. теңгеден астам сомаға заемдар беруді жоспарлап отырмыз.
– «Қазақстан тұрғын үй құрылыс жинақ банкінде банктің дамуының ұзақ мерзімді стратегиясы қабылданған болатын. Осы жылдарда Банк қандай болмақ?
– 2010-2015 жылдарғы ұзақ мерзімді стратегиялық дамуға сәйкес Банк Қазақстан қаржылық нарығында үлкен көрсеткіштерге қол жеткізбек.
Банкті дамытудың стратегиялық мақсаты бәсекелік қабілеттілігін тұрғын үй құрылыс жинағы жүйесіне қатысушылар санын экономикалық белсенді халық қатарынан 6% жеткізу (тұрғын үй құрылыс жинағы туралы 600 мың шарт) және өз капиталының ұлғаюын 2015 жылдың аяғына дейін 10% көтеру.
2015 жылға деген ұзақ мерзімді стратегияның сапалық және сандық көрсеткіштері бірнеше кезеңнен тұрады. Жоспарлауымыз бойынша 2015 жылы құрылыс және пәтер алу бойынша заемның мөлшері 8,2% құрауға тиісті. Агенттік жүйенің тиімділігін арттырамыз. Қызмет көрсету сапасын арттыру бағытында тыңғылықты жұмыстар атқарылады. Қызмет көрсету сапасының деңгейі Қазақстан тұрғын үй құрылыс жинақ банкінің барлық бөлімшелерінде 95% құрауға тиісті.
Бірқатар мәселелер топтамасы Банктің танымалдығын 65% көтеруді көздейтін Банктің маркетингтік саясатына байланысты. Біз іске асырылатын және қол жеткізілетін мақсаттарды алға қойып отырмыз, сондықтан барымызды салып еңбектенеміз және Банктің барлық буындарының қызметін үздіксіз жетілдіре беретін боламыз.
– Мазмұнды әңгімеңіз үшін үлкен рахмет! Сізге үлкен табыстар тілейміз!
– Бүкіл Қазақстан халқын бірегей тарихы мен мәдениеті бар, кең байтақ, бақ-береке қонған әрі ғажайып еліміздің Тәуелсіздігіне 20 жыл толу мерекесімен шын жүректен құттықтауға рұқсат етіңіздер!
Барлық қазақстандық отбасы өзінің жеке баспанасына қол жеткізіп, әрбір үйде жылылық, жайлылық және бақыт орнасын!
Әңгімелескен Ибрагим КАППАСОВ.