Алматыда халықаралық дәстүрлі медицина және халық емшілерінің ІІІ съезі өтті. Үш күнге созылған алқалы басқосуға отандық халық емшілерімен қатар 17 мемлекеттен – Қытай, Моңғолия, Ресей, Жапония, Украина, Түркия, т.б. елдерден келген қонақтар қатысты.
– Мемлекет басшысы Н.Назарбаев қашанда ұлттың денсаулығы мәселесіне орасан көңіл бөледі, – деді съезді ашқан Денсаулық сақтау министрлігі жанындағы «ҚР халықтық және рухани емшілер» мекемесінің директоры, ШЫҰ шеңберінде Дәстүрлі медицина академиясын құру жөніндегі ШЫҰ-ға мүше мемлекеттердің ресми өкілі Шәкен қажы Шынтаев. – Съезд күндері біздер бір-біріміз арқылы халықтық емнің жаңа мектебімен танысып, тәжірибе, әдіс-тәсілдерімізбен бөлістік. Ал мұның барлығы біздің отандастарымыздың денсаулығы үшін қызмет жасайтын болады.
Бір айта кетерлігі, бүгінде халықтық ем қанатын кең жая түсуде. Оған Шаңхай ынтымақтастығы ұйымы шеңберінде Дәстүрлі медицина академиясын құру жөнінде қанатқақты жоба ұсынып, соның негізінде ұйымға мүше мемлекеттер меморандумға қол қоюы дәлел болса керек. Оның штаб-пәтері Пекин мен Мәскеуде орналасқан. Бағдарламаның мақсаты – кадр дайындап, олардың білімін жетілдіру, дәстүрлі медицинамен халықты емдеуді жоғары ғылыми тұрғыда негіздеу. Қазір Қазақстанда осы академия құрылып, өз жұмысын бастап кетті. Елімізде өткен бұл жиын осы мәселенің оң шешілуіне ықпалын тигізбек.
Форумда сөйлеген шешендер дәстүрлі халықтық медицина мен емшілікті ұйымдастырудағы жұмыстарды, практикалық қызметтерін сараптан өткізіп, келесі жылы Түркияда өтетін халықаралық симпозиумда қаралатын мәселелерге қатысты ұсыныстарын пысықтады.
Гүлзейнеп СӘДІРҚЫЗЫ.