Кеше Астана қаласы әкімдігінде ел Тәуелсіздігінің 20 жылдығына орай 17 құрылыс компаниясы мен бір жеке тұлға әлеуметтік әріптестік шеңберінде елордада тұрып жатқан мүмкіндігі шектеулі балалары бар 20 отбасына тегін пәтер кілттерін табыс етті.
Астана қаласының әкімі Иманғали Тасмағамбетов аталмыш шарада Астанада Тәуелсіздіктің 20 жылдығы қарсаңында мұқтаж жандарға қол- ұшын беру, мейірімділік таныту секілді игі дәстүрлердің жалғасын тауып келе жатқанына ризашылығын білдірді. Сондай-ақ ол елдің бірлігі мен берекесінің осындай сауапты істерде жатқанын да назардан тыс қалдырмады. Мұндай алғашқы акция Астана күнінде орын алып, ол кезде 17 құрылыс компаниясынан астаналықтардың 24 мұқтаж отбасылары пәтерге ие болған-ды. Әкім өз сөзінде осындай азаматтарға жәрдем беру жөнінде бастама мемлекеттік органдардан емес, жеке компаниялар тарапынан көтеріліп, олар кезекті мәрте әкімдікке аталған қайырымдылық идеясымен шыққанына тоқталды.
Қайырымдылық бастамасын құрылыс компанияларының көтеруі кездейсоқ емес. Өйткені, еліміз егемендік алып, қала елорда мәртебесіне ие болғалы осы сала қарқынды дамып келеді. Құрылыс саласы бүкіләлемдік қаржы дағдарысы жылдарында мемлекет тарапынан үлкен қолдауға ие болып, жаңа серпін алды. Астананың тұрғын үй саласындағы жыл сайынғы өсімі 30-50 мың шаршы метрді құрайды. Өткен жылы 1 млн. 380 мың шаршы метр тұрғын үй салынған болса, биыл 1 млн. 400 мың шаршы метр тұрғын үй пайдалануға берілмек. Тек соңғы үш жылда 4 млн. шаршы метр тұрғын үй пайдалануға берілсе, осыған сәйкес, құрылыс саласына тартылатын инвестиция көлемі де ұлғайған. Астананың әлі де 5 млн. шаршы метр тұрғын үй салуға әлеуеті бар. 2011 жылдан бастап бас қалада тұрғын үй құрылысының 2014 жылға дейінгі жаңа бағдарламасы жүзеге асырыла бастады. Оның аясында 1 млн. шаршы метр тұрғын үй салынбақ. Оны жүзеге асыру барысында «Мыңжылдықтар аллеясы», «Хан Шатыр» кешенінің батыс бөлігі мен Қабанбай батыр даңғылының Әуежай айналма жолынан Сығанақ көшесіне дейінгі аудандары игеріле бастайды.
Әбдірахман ҚЫДЫРБЕК.
110 отбасына – пәтер, 330 бөбекке – балабақша
Облыста ел Тәуелсіздігінің 20 жылдығына арналған игі шаралар жарыса жалғасуда. Өткен аптада Екібастұз қаласында ашылған «Гнездышко» атты балабақшада қазақ, орыс тілдерінде тәрбие беріледі. Іші-сырты бірдей әдемі ғимарат бөбектерге жақсы сыйлық болғандай. Балабақшада барлық жағдай жасалған. Осындай жаңа сәулетті балабақшаны тұрғызу үшін республикалық бюджеттен 640,8 миллион теңге бөлінді. Құрылысшылар да мереке алдындағы уәделерінде тұрды. Бүлдіршіндер мен ата-аналарды ашылу салтанаты кезінде Екібастұзда болған облыс әкімі Бақытжан Сағынтаев құттықтады. Яғни, облыста елімізде қабылданған мемлекеттік «Балапан» бағдарламасы жүзеге асуда. Жыл соңына дейін мұндай қуаныштар көбейеді. Қала әкімі Александр Вербняктың айтуынша, кеншілер қаласында бөбектердің 93 пайызы балабақшаға барады деуге болады. Жаңа балабақшаның ашылуымен бірге осы жерде 100 адам жұмысқа орналасты.
Ал, қалаға қарасты ауылдарда мектептер жанынан шағын орталықтар да ашылуда. Жыл соңына дейін Ақсу, облыс орталығында және аудан орталықтарында да балабақшалар пайдалануға беріледі. Сонымен қатар, облыс орталығында «Қазақстан алюминийі» АҚ құрылысын жүргізіп жатқан көп қабатты үйдің бірінші қабатында шағын балабақша ашу жоспарланып отыр.
Айтпақшы, «Жұмыспен қамту-2020» бағдарламасы шеңберінде қалада 110 пәтерден тұратын 5 қабатты екі үйдің құрылысы үшін республикалық бюджеттен 385 миллион теңге бөлініпті. Қазір құрылыс жұмыстары қарқынды жүргізілуде.
Фарида БЫҚАЙ.
Екібастұз.