Ұйымның жаңа төрағалары қызметіне сенім ұялатып отыр
Литва астанасы Вильнюсте өтіп жатқан Еуропадағы қауіпсіздік және ынтымақтастық ұйымына мүше мемлекеттер Сыртқы істер министрлері кеңесінің 18-ші отырысы кеше өз мәресіне жетті. Еліміз Сыртқы істер министрі Ержан Қазыханов бастаған қазақстандық делегация қатысқан кеңес аясында көптеген шаралар жүзеге асырылды. Сондай игі шаралардың бірі «Қазақстан – Балтық елдері тұрғындарының көзімен» деп аталған фото және сурет көрмесінің өткізілуі болды. Мұнда 50-ге тарта танымал және әуесқой фотосуретшілердің және мектеп оқушыларының туындылары қойылыпты. Суреттерде негізінен табиғат көріністері, қазақтардың тұрмыс-тіршілігі бейнеленген. Ал мектеп оқушыларының суреттерінде қазақтың ұлттық ою-өрнектері, Астана мен Бәйтерек көрініс тапқан. Көрмеде біз Литва Республикасы Сеиміндегі Қазақстан-Литва депутаттық тобының жетекшісі Едмундас Пупинисті жолықтырдық. Ол өз сөзінде Қазақстан туралы білетін литвалықтар қатары арта бастағанын атап көрсетті. Мына көрмеге қойылған суреттердің көптігінен осыны аңғаруға болады, деген ол осындай шаралардың көптеп өткізілуі елдер азаматтарының бір-бірін танып білуде өте маңызды екендігімен бөлісті. Делегациялар өтетін жолдың дәлізіне қойылған көрмені ЕҚЫҰ Іс басындағы төрағасы, Литва сыртқы істер министрі Аудронюс Ажубалис та арнайы келіп тамашалады. Сондай-ақ көрмеге қойылған туындылармен еліміз Сыртқы істер министрі Ержан Қазыханов бастаған қазақстандық делегация да келіп жақын танысқандығын айта кету керек. Кеңес отырысы аясында Ержан Қазыханов БҰҰ Бас хатшысының Ауғанстандағы арнайы өкілі болып қайта тағайындалған Ян Кубишпен кездесу өткізді. Еліміз сыртқы саясат ведомствосының басшысы өзара әңгіме барысында осы елдегі қазіргі жағдай және тұрақтылықты қамтамасыз ету перспективаларын талқылады. Әсіресе, Қазақстанның БҰҰ-мен тығыз қатынаста әрекет етуі маңыздылығына ерекше ден қойды. Елімізде биылғы егіннің бітік шығуына байланысты Қазақстан БҰҰ-ның Азық-түлік және ауыл шаруашылығы ұйымы мен Бүкіләлемдік азық-түлік бағдарламасы желісі бойынша Ауғанстанға астық пен жанар-жағармай жеткізуге дайын екендігін білдірген Ержан Қазыханов осы орайда оның сенімді әрі кедергісіз жеткізілуін қаматамасыз етудің маңызын ашып көретті. Сондай-ақ министрдің ТМД-ның Атқарушы хатшысы Сергей Лебедевпен жүздесуі болғандығын да айта кету керек. Оның барысында Мәскеу қаласында алдағы 20 желтоқсанға жоспарланып отырған ТМД-ның құрылуына 20 жыл толуына орай өткізілетін саммитке дайындық жайы қаралды. Е.Қазыхановтың Эстония сыртқы саясат ведомствосының басшысы Урмас Паэтпен кездесуінде екіжақты ынтымақтастық мәселесі, әсіресе, Мемлекет басшысы Н.Назарбаевтың 2011 жылдың сәуірінде Таллинге жасаған сапарынан кейін оң қарқын алғандығы орынды аталды. Сонымен қатар, қазақ-эстон үкіметаралық комиссиясының маңызды рөлі мен үстіміздегі жылы Эстонияның Астанада елшілік ашуы екіжақты қарым-қатынастарда ерекше маңызға ие екендігі ортаға салынды. Ержан Қазыхановтың Литва Сыртқы істер министрі Аудронюс Ажубалиспен кездесуі кезінде екіжақты және Еуропа Одағы мен ЕҚЫҰ арасындағы ынтымақтастықтың жай-жапсары әңгіме өзегіне айналды. Тараптар сондай-ақ Литва президенті Даля Грибаускайтенің Астанаға сапарында жоғары деңгейдегі қол жеткізілген келісімдерді жүзеге асыру барысында нақты бағыттардың айқындалғанына қанағаттанушылық білдірді. ЕҚЫҰ мәселесі Ержан Қазыханов пен Ұйымның Бас хатшысы Ламберто Занньермен кездесуінде жан-жақты қозғалды. Осы ретте Астанада қауіпсіздік жөніндегі зерттеу институтының құрылуы мүмкіндігі де назардан тыс қалған жоқ. ЕҚЫҰ Парламенттік Ассамблеясының төрағасы Петрос Эфтимиумен жүздесуде де әңгіме Ұйым шеңберіндегі өзара ықпалдастық мәселесіне құрылғандығын айта кеткен жөн. Е.Қазыханов ЕҚЫҰ ПА төрағасына Ассамблеяның еліміздің 2010 жылы төрағалық ету барысында қолдау көрсеткеніне ризашылығын да жеткізуді ұмытқан жоқ. Сондай-ақ, алдағы Парламент Мәжілісінің сайлауы мәселесі де сөз болды. Ұйым бұл сайлауға ЕҚЫҰ ПА құрметті төрағасы Жоао Соареш бастаған қысқа мерзімді байқаушылар миссиясын жібермекші. Сонымен қатар, Вильнюсте Ержан Қазыхановтың Кипр сыртқы істер министрі Эрато Козаку-Маркуллиспен, ирландиялық әріптесі Эимон Гилмормен, Еуропа Одағының Орталық Азия жөніндегі арнайы өкілі Пьер Морельмен кездесті. ЕҚЫҰ-ға мүше мемлекеттер Сыртқы істер министрлері кеңесінің 18-ші отырысының қорытындысы бойынша баспасөз мәслихаты ұйымдастырылды. Ол туралы газетіміздің келесі нөмірінде әңгімеленетін болады. Асқар ТҰРАПБАЙҰЛЫ, «Егемен Қазақстан» – Вильнюстен.
•
08 Желтоқсан, 2011
Қазақстандық рух
274 рет
көрсетілді