Женевадағы көркем ғимараттардың бірі – «Four Seasons Hotel» қонақ үйінде Қазақстан Республикасы Тәуелсіздігінің 20 жылдығына арналған ресми дипломатиялық қабылдау өтті, деп хабарлады Сыртқы істер министрлігінің баспасөз қызметі.
Салтанатты шараға Біріккен Ұлттар Ұйымы Бас хатшысының орынбасары – БҰҰ Женевадағы бөлімшесінің Бас директоры Қасым-Жомарт Тоқаев, халықаралық ұйымдар және дипломатиялық корпус басшылары мен қызметкерлері, жергілікті мемлекеттік органдар өкілдері қатысты.
Қабылдау барысында қатысушылар Президент Н.Назарбаевтың басшылығымен мемлекетіміздің 20 жылда қол жеткізген табыстары атап өтілді. Қазақстанның ЕҚЫҰ-ға төрағалығы мен Астана Саммитi, ИЫҰ мен ШЫҰ-ға төрағалығы және басқа да бастамаларын еліміздің халықаралық аренада жоғары беделiнiң көрінісі ретінде айқындай отырып, БҰҰ-мен орнатылған ынтымақтастыққа келесі жылы 20 жыл толатындығы сөз болды.
Қонақтарға қазақ ұлттық тағамдары ұсынылып, Тәуелсіздігіміздің 20 жылдығына орай ізгі құттықтаулары мен тілектестіктерін білдіре келген шетелдік меймандарды Швейцарияда музыкалық білім алып жүрген жас таланттарымыз қазақ әуендерін классикалық орындаумен тәнті етті.