Кеше Парламент Сенатының Төрағасы Қайрат Мәмидің төрағалық етуімен палатаның кезекті жалпы отырысы болды. Онда «Қазақстан Республикасы Мемлекеттік тәуелсіздігінің 20 жылдығына байланысты рақымшылық жасау туралы» Заң қабылданды. Оны талқылау барысында төраға «Penal Reform International» (Халықаралық түрмелер ұйымы) ұйымы Орталық Азиядағы өкілдігінің деректері бойынша халықтың әр 100 мың адамына шаққанда, оқшауланған адамдар саны жөнінен Қазақстан дүние жүзінде 22-орын алатынын айтты. Бұл ұйым пайдаланған мәліметтер бойынша біздің елімізде бас бостандығынан айыру орындарында 52,6 мың адам бар. Бұл да дәл мәлімет емес, өйткені, онда екі дерек қана жинақталып көрсетілген: колониялардағы адамдар саны – 45 мыңнан астам, сондай-ақ тергеудегі оқшаулау орындарындағы адамдар саны – 7 мыңға жуық, яғни әлі сотталмағандар, дей келіп, Төраға бұл мәселені барынша мұқият және кәсіби тұрғыда қарау қажеттігін атап өтті.
Отырыста «Газ және газбен жабдықтау туралы» заң жобасы Сенат енгізген өзгерістерімен және толықтыруларымен қабылданды. Одан басқа, «Мемлекеттік құқықтық статистика және арнайы есепке алу туралы» Заңға өзгерістер мен толықтырулар енгізу туралы», «Кейбір халықаралық ұйымдардың жарғылық құжаттарын бекіту туралы» Заңға өзгеріс пен толықтыру енгізу туралы» заң жобалары қабылданды.
Қаралған мәселелер бойынша Экономикалық даму және сауда министрі Қ.Келімбетов, Мұнай және газ министрі С.Мыңбаев, Әділет министрі Р.Түсіпбеков, Статистика агенттігінің төрағасы Ә.Смайылов тиісті түсініктемелер берді.
Отырыста сондай-ақ ұйымдық мәселелер қаралды. Атап айтқанда, Парламент Сенатының үш тұрақты комитетінің атауы өзгерді. Олар Конституциялық заңнама, сот жүйесі және құқық қорғау комитеті, Экономикалық даму және кәсіпкерлік комитеті, Табиғатты пайдалану және ауылдық аумақтарды дамыту комитеті болып аталады.
Сондай-ақ палатадағы тұрақты комитеттердің төрағалары мен мүшелері сайланды. Конституциялық заңнама, сот жүйесі және құқық қорғау комитетінің төрағасы болып Берік Имашев, Қаржы және бюджет комитетінің төрағасы болып Рашит Ахметов, Халықаралық қатынастар, қорғаныс және қауіпсіздік комитетінің төрағасы болып Икрам Адырбеков, Экономикалық даму және кәсіпкерлік комитетінің төрағасы болып Талғатбек Абайділдин, Әлеуметтік-мәдени даму комитетінің төрағасы болып Ақан Бижанов, Табиғатты пайдалану және ауылдық аумақтарды дамыту комитетінің төрағасы болып Болат Жылқышиев сайланды.
Жақсыбай САМРАТ.