«Егемен Қазақстанның» арнайы жобасы: Жасампаздық жемістері
Жиырма жылдың ішінде атқарылған игі істердің арқасында әрбір өңіріміз өзгеріп, өміріміз жақсарып келеді. «Егемен Қазақстан» газеті осындай өркенді өзгерістерді бейнелейтін материалдарды тұрақты жариялап тұрады. Төменде Қостанай облысының Науырзым ауданындағы Шолақсай ауылынан фоторепортаж беріліп отыр.АУЫЛ АДАМДАРЫМЕН АЖАРЛЫ
Науырзым ауданындағы Шолақсай ауылы облыс орталығынан екі жүз шақырым жерде орналасқан. Тәуелсіздіктің елең-алаңындағы қиындықтар шалғайдағы Шолақсай ауылының да есінде. Жоспарлы экономика кетіп, нарық келді. Шаруашылықты жаңаша ұйымдастыру керек болды. Түрлі ұлт өкілдері айрандай ұйыған Шолақсай ауылы бар қиындықтарды жеңе білді. Елбасы Нұрсұлтан Назарбаевтың сарабдал саясатының арқасында дамудың даңғыл жолына түскен елмен бірге еңсесін тіктеді. 90-шы жылдары Өмірзақ Ихтиляповтай білікті ұйымдастырушы келмегенде Шолақсай да «болашағы жоқ» ауылдар қатарына еніп, облыс картасынан өшіп кетер ме еді, кім білсін. Өмекең алдымен шаруашылықты дұрыстады. Қазір «Шолақсай» жауапкершілігі шектеулі серіктестігі 20 мың гектар жерге егін егеді. Мал да бар. Ешқандай несие алмастан, шаруашылықтың өз қаржысына техника паркін жаңартты. Ресейден, Канададан жер өңдейтін, егін себетін кешен, германиялық комбайндар алынды. Заманауи озық техника болмай, жерді күте алмайсың. Диқан күтімі келіскенде ғана жер-ана иетінін шолақсайлықтар жақсы біледі. «Шолақсай» облыстағы өз ұшағы бар санаулы шаруашылықтың бірі. Қазір техникалар баяғыдай қардың астында жатпайды, қысы бойы арнаулы ангарларда сақталады. «Шолақсай» жауапкершілігі шектеулі серіктестігі ауылда 500 адамды жұмыспен қамтып отыр. – Ауылдастарды жұмыспен қамту аз. Адамдар ауылда тұру үшін олардың әлеуметтік тұрмысын жақсарту керек. Адам тұрмаса ауыл қалай көркейсін, – дейді Өмірзақ Ихтиляпов. Білікті басшының сөзі мен ісінде алшақтық жоқ. Шаруашылық ауыл тұрғындарына шөптің тоннасын 2 мың теңгеден сатып, оны әр үйге түсіріп береді. Облыстың өзге аудандарымен салыстырғанда мұның өте арзан екенін айтқан ләзім. Ауыл наубайханасында пісірілген 800 грамм бөлке нанды ауылдастар небәрі 25 теңгеден алады. Ал облыста 600 грамм бөлке нан 42 теңге тұрады. Шаруашылық тұрғындарға көмірдің тоннасын 3 мың теңгеден түсіріп берді. Ал облыста көмірдің тоннасы кем дегенде 7 мың теңге. Өткен жылы ауыл мектебі 12 миллион теңгеге қайта жөндеуден өткізілді. Бұрын қаңқасы қалған балабақшаны қайта жасап, қатарға қосу шаруашылыққа 10 миллион теңгеге түсті. Мектепті компьютерлендірді, интерактивті тақта да алып берді. Шалғай ауылдың балалары өркениеттің жетістіктерінен кенже қалып отырған жоқ. Ауылда клуб та, мейрамхана да бар. Ел іші жаназасыз, тойсыз болмайды, сондай жиындардың барлығы да ауылдың тойханасында өтеді. Шолақсай ауылына табиғаттың өзі нұрын төккен жер. Бұл ауылдың әр үйінде суы бұлақтай кәусар тұщы құдық бар. Өмекең қайсыбір жылдары жастар қалаға кетсе, ауылдың ертеңі не болар екен деп ойланып жүретін. Әлеуметтік тұрмысы жақсы ауылдан жастар неге қашсын. Өзінің ұлы Мәдиден бастап, қалаға түрлі оқуға кеткен мектеп түлектері ауылға келді. Педагогика институтын бітірген Мәди алғашында ауыл мектебінде мұғалім болып істеді де, соңғы оншақты жылда әкесіне көмектесті. Қазір шаруашылықты басқаруды толықтай өз міндетіне алған. Әкесі бір ізге салып берген шаруашылықты Мәди одан әрі дамытқысы келеді. Жас шаруашылық басшысының егінмен қатар, мал шаруашылығын өрістеткісі, жеміс бағын өсіргісі және жас мамандарға арнап үй салғысы келеді. Ауыл мектебі ұжымының 80 пайызы жас мамандар. Олардың барлығы дерлік Шолақсай ауылының өз жастары, кеше ғана осы мектепті бітіріп шыққан түлектер. Жас болса да білікті басшы Мәди оларға баспана қажеттігін біліп отыр. Міне, Тәуелсіздіктің әр таңы Шолақсай ауылына нұр септі. Көркейді, ертеңіне де сенімді. Қостанай облысы, Науырзым ауданы, Шолақсай ауылы. ________________________________ Арнайы бетті дайындаған «Егемен Қазақстан» газетінің Қостанай облысы бойынша меншікті тілшісі Нәзира ЖӘРІМБЕТОВА.