Астана қаласының 20 жылдық мерейтойы қарсаңында Мәдениет және спорт министрлігінің қолдауымен елордадағы Ұлттық музейде «Поль Серюзье және Бретань: аңыздардың сиқыры» атты көрме ашылды.
Көрмені әзірлеп әкелген – Франция елінің Ұлттық музейлер бірлестігі. Шараның ашылу салтанатында сөз алған Францияның Қазақстандағы Төтенше және өкілетті елшісі Филипп Мартинэ мырза өз еліндегі ежелгі рухани мұралар сақшысы – Ұлттық музейлер бірлестігі өткен жылы Астана ұйымдастырған халықаралық мамандандырылған ЭКСПО көрмесі аясында елордалықтарға француз тарихына қатысты құнды дүниелер ұсынған болса, енді міне ХІХ ғасырдағы француз символикасының ірі өкілі Поль Серюзенің картиналары әкелініп отыр деді.
Сондай-ақ көпшілікті көрменің маңызымен таныстырған Мәдениет және спорт министрі Арыстанбек Мұхамедиұлы бір жыл бұрын мәдениет, өнер және мәдени мұраны сақтау саласында еларалық ынтымақтастық меморандумына қол қойылғанын, бұл шара соның жалғасы екенін жеткізді.
Көрмеге барлығы 48 жауһар картина әкелінсе, соның 80 пайызының авторы – Поль Серюзе. Жұмыстар түгелдей дерлік тұпнұсқа. Оның «Теңіз бен жағалау», «Тоқымашы», «Махаббат бәйтерегі» қатарлы еңбектері модерн стиліне жақын ар-нуво символистер тобына жатады екен. Негізінен бұл топты еуропалық өнертанушылар «Наби» шығармашылық бағыты деп бағалайды. Қазақша айтқанда, тылсыммен сырласушылар.
Аталмыш топ өкіліне жататын кескіндемешілер – Эмиль Бернар, Пьер Боннар, Моррис Дени, Анри Море, Максим Морра, Поль Гоген, тағы басқаларының туындылары да көрме сөресінен орын алыпты. Бұлардың бәрі бүгінде өмірден озған, бірақ суреттері арқылы әлемге танымал тұлғалар.
Көрме комиссары тәуелсіз өнертанушы және Серюзье атындағы комитет төрағасы Каролин Бойль-Тернердің пікірінше, бұл кескіндемелер көрмесі тұңғыш рет Франция шекарасынан асып, Еуразия кеңістігіне, соның ішінде қазақ даласына келіп отыр, сонымен қатар туындылардың дені кескіндеме болғанымен декоративті интерьер әшекейлерінен тұратын ар-деко өнерінің бірегей үлгісі. Ал көрменің көркемдік мәнеріне келсек, мұндағы картиналар көрерменді қиял әлеміне жетелейтін модерн стилінің әсемдік сипатын сіңірген дүниелер.
Бекен ҚАЙРАТҰЛЫ,
«Егемен Қазақстан»