Тәуелсіздік мерекесі қарсаңында Алматыда күй анасы Дина Нұрпейісованың 150 жылдығына арналған кеш өтті.
«Домбыраның әр пернесінің өз мәні бар, домбыра тартқанда оның мән-мазмұнын дұрыс анықтау бірден-бір шартты нәрсе. Домбыра шерткенде оны адамша сөйлетіп, сол арқылы белгілі бір күйдің мағынасын тыңдаушыға толық жеткізу керек» – дейтін Дина Нұрпейісованың күйлерін сағынған өнер сүйер қауым бұл кешке көп жиналды.
Қазақтың Құрманғазы атындағы ұлт-аспаптар оркестрінің көркемдік жетекшісі бас дирижер Жалғасбек Бегендіковтің сүйемелдеуімен оркестр Дина анамыздың бірнеше күйлерін тамылжыта орындап, көпшілікті тәнті етті. Сондай-ақ домбырашы Айгүл Үлкенбаева орындаған Динаның күйіне Ғарифолла Құрманғалиевтің шәкірті Сәуле Жанпейісова шырқаған Мұхит әндеріне де көпшілік риза болды.
Кеш соңында Динаның немересі, 75 жастағы Балжан Жұрынбайқызы ортаға шығып, осы кешті өткізуге ұйытқы болған Алматы қаласы әкімдігі мен көпшілік қауымға, өнер майталмандарына ақ ниетті алғысын білдірді.
Ғалым ҚҰРАШ, журналист.