Қорғаныс министрлігінің ұйымдастыруымен Қарағанды облысы аумағындағы «Спасск» оқу орталығының полигонында Мемлекеттік хатшы Гүлшара Әбдіқалықованың қатысуымен төртінші «Айбын» республикалық әскери-патриоттық жастар жиынының ашылу рәсімі өтті.
Аталған іс-шараға, сондай-ақ Қарағанды облысының әкімі Ерлан Қошанов, Парламент депутаттары, Қазақстан Қарулы Күштерінің ардагерлері, «Жас сарбаз» әскери-патриоттық қоғамдық қозғалысы республикалық штабының мүшелері, мемлекеттік органдар, қоғамдық бірлестіктер өкілдері, әскери-патриоттық клубтардың, республикалық «Жас Ұлан» мектебінің және облыстардағы әскери мектеп-интернаттардың 600-ден астам тәрбиеленушісі қатысты.
Мемлекеттік хатшы өзінің құттықтау лебізінде Елбасы, Қазақстан Қарулы Күштерінің Жоғарғы Бас Қолбасшысы Нұрсұлтан Назарбаевтың: «Мемлекет әрдайым өз қауіпсіздігін және шекарасының беріктігін ойлауға тиіс» деген сөзіне назар аударды.
– Сондықтан әрбір қазақстандық әрдайым жауапты әрі мәртебелі миссияға – туған елін, Қазақстанымызды қорғауға дайын болуы керек деп санаймын. Бұл – кез келген азаматтың қастерлі борышы ғана емес, ең алдымен, Отан қорғау жолында мәңгілік даңққа, халық сүйіспеншілігіне бөленген бабаларға, әкелеріміз бен аталарымызға деген тағзым мен құрметтің белгісі, – деді Гүлшара Әбдіқалықова.
Ал Қорғаныс министрінің орынбасары Талғат Мұхтаров еліміздің дамуы мен келешегі жастарға тікелей байланысты екендігін атап өтті.
– Жастарға тәрбие беру ісінде әскери-патриоттық жұмыстың мәні өте зор. Сондықтан жастардың үлкен жиынын өткізіп келеміз. Биылғы жиынның ерекшелігі – Қарулы Күштердің, сондай-ақ Ұлттық қауіпсіздік комитетінің Шекара қызметіне қарасты әскери бөлімдері мен мекемелері жанынан құрылған әскери-патриоттық жиындардың тәрбиеленушілерінің қатысуы болып отыр, – деді Т.Мұхтаров.
Оның айтуынша, соңғы жылдары еліміздің аумағында кадет сыныптары көптеп ашыла бастаған. Атап айтқанда, министрлік жуырда ғана Астана әкімдігімен бірлесіп елорданың 20 жылдығына байланысты 30 кадет сыныбын ашты. Мұндай топқа қабылданған жастар басқа пәндермен бірге, әскери мамандықтың қыр-сырын, қоян-қолтық ұрыс тәсілдерін, робот техникасының негіздерін үйренуде.
– Бізді жастар арасында өмірін әскери саламен байланыстырғысы келетін өрендердің көптігі қуантады. Олардың қазірдің өзінде отан қорғаушылармен бір сапта тұруға құлшыныстары жоғары. Осы әрі күрделі, әрі мәртебелі мамандықты таңдауға әскери-патриоттық тәрбие беру орталықтарының әсері мол, – деді генерал-лейтенант.
Сонымен қатар Қорғаныс министрлігінің деректеріне қарағанда, Астанада Қазақстанның Тұңғыш Президенті, Қазақстан Қарулы Күштерінің Жоғарғы Бас Қолбасшысы атындағы әскери-патриоттық бағыттағы демалыс және мәдениет саябағын салу жоспарланған.
Іс-шараға қатысушыларға құттықтау сөзін арнаған Қарағанды облысының әкімі Ерлан Қошанов та «Айбын» жиынының патриоттар ұстаханасына айналғандығын атап өтті. Сонымен қатар облыс әкімі барлық қатысушыларға осы айтулы шараның тиімді әрі пайдалы болуына тілектестігін білдірді.
«Айбын» жиынына еліміздің түпкір-түпкірінен жиналған жастардың барлығы дерлік аймақтардағы әскери-патриоттық жиындардың жеңімпаздары болды. Оларға іс-шараның ашылу рәсімінде Қазақстан Республикасы Қарулы Күштерінің бөлімшелері тарапынан жас патриоттарға әскери өнердің қимыл-әрекеттері көрсетілді. Әсіресе, ықтимал қарсыластарға әуеден және жерден жасалатын соққылардың, әскери қас шеберлердің өнерлерін тамашалаған жеткіншіктер ерекше әсерге бөленді. Солардың қатарындағы ақтөбелік Әлішер Қартбай әкесінің жолын қуып әскери салаға таңдау жасағандығын, енді жиындағы көріністерден кейін Кеңес одағының екі мәрте батыры Талғат Бигелдинов атындағы Әуе қорғаныс күштері әскери институтына оқуға түсіп, әскери ұшқыш атануға түпкілікті шешім қабылдағанын жеткізді.
– Аймақтарда осы жиынға келудің өзі оңайға соққан жоқ. Алайда облыстық жиында биік кермеге 25 рет тартылып, автоматты қаруды 13 секундта жартылай бөлшектеп-құрастырып жеңімпаздардың қатарынан көріндім. Ал «Айбын» жиынындағы көріністер менің арманыма қанат бітірді, – дейді Ә.Қартбай. Ал осы Әлішердің бойындағы сезім ұшқыны барлық қатысушылардың жанарларынан байқалып тұрғандығын да айта кету керек.
Жалпы бес күнге созылатын «Айбын» республикалық әскери-патриоттық жастар жиынының жоспарына сәйкес Қарулы Күштер құрамына кіретін әскер түрлері өкілдерінің жиынға қатысушылармен «Ұлы дала әскері – «Мәңгілік Ел» тірегі!» атты тақырыптағы интерактивті кездесуі, сонымен қатар «Айбын дарыны» зияткерлік ойыны, робот техникасы бойынша «Менің роботым» конкурсы, алау түбінде «Айбын жалыны» атты қызықты кеш, спорттың әскери-қолданбалы түрлерінен және жауынгерлік дайындық пәндерінен көптеген сайыстар ұйымдастырылды.
Тәрбиеленушілер, сондай-ақ әскери-патриоттық жастар жиыны аясында әскери дайындық мектебінен өтіп, әскери техниканың және Қазақстан әскеріндегі қару-жарақтың заманауи үлгілерімен танысты.
Сонымен қатар жиын аясында «Айбын – жұлдыздық мекені» белгісі мен «Тілек білдіру ағашының» салтанатты ашылуы да өтті.
Соңында Мемлекеттік хатшы жиынға қатысушыларға сайыстардың жақсы өтуіне, әрдайым рух сергектігі мен ерік-жігерлерін көрсетуіне, ешқашан жеңістен үміт үзбей, Қазақстанның нағыз патриоттары болуына ниеттестігін білдіріп, толағай табыс тіледі.
Атап өтерлігі, еліміздің аумағында «Жас сарбаз» атты әскери-патриоттық қоғамдық қозғалыс құрылып, әрбір облыста бөлімшелері ашылып, бүгінде 73 мыңнан аса баланың басын біріктіріп табысты жұмыс істеуде.
Қоғамдық қозғалыс арқылы бүгінге дейін әскери-патриоттық тәрбие беру саласында бүкілресейлік «Юнармия» әскери-патриоттық қозғалысымен, Қызылорда облысының әкімдігімен ынтымақтастық туралы меморандумға қол қойылған. Дәл осындай құжатқа төртінші жиын аясында Қарағанды облысының әкімдігімен арада қол қойылды.
Серік ӘБДІБЕК,
«Егемен Қазақстан»