Мемлекеттік хатшы Гүлшара Әбдіқалықованың төрағалығымен Президент жанындағы Әйелдер істері және отбасылық-демографиялық саясат жөніндегі ұлттық комиссияның отырысы өтті.
Отырысты ашқан Г.Әбдіқалықова Елбасы Н.Назарбаевтың «Күн санап өзгеріп жатқан дүбірлі дүниеде сана-сезіміміз бен дүниетанымымызға әбден сіңіп қалған таптаурын қағидалардан арылмасақ, көш басындағы елдермен тереземізді теңеп, иық түйістіру мүмкін емес. Өзгеру үшін өзімізді мықтап қолға алып, заман ағымына икемделу арқылы жаңа дәуірдің жағымды жақтарын бойға сіңіруіміз керек», деген сөзіне баса назар аударды.
Мемлекеттік хатшы «Рухани жаңғыру», «Президенттің бес әлеуметтік бастамасы» бағдарламалары қоғамдық сананы жаңғыртуға және өмір сүру сапасын арттыруға бағытталғанын атап өтті. Бұл тұрғыда өскелең ұрпақтың рухани-адамгершілік қасиеттерін дамыту және олардың құқықтары мен заңды мүдделерін қамтамасыз ету мәселелері ерекше мәнге ие болып отыр.
Қазақстанда балалардың құқықтары мен мүдделерін қамтамасыз ету үшін институционалдық негіз құрылған. Бұл ретте 15 халықаралық құжат ратификацияланды, Балалар құқықтары жөнінде уәкіл институты, Балалардың құқықтарын қорғау комитеті, қиын ахуалдағы балаларға қолдау көрсету орталықтары жұмыс істейді.
«Өзін-өзі тану» адамгершілік-рухани білім беру бағдарламасы 71 білім беру ұйымында қанатқақты жоба ретінде іске қосылған. Сонымен қатар кәмелетке толмағандар арасындағы зорлық-зомбылықтың алдын алуға бағытталған «Балаларды бірге қорғаймыз» атты жол картасы Бас прокуратурамен бірлесе жүзеге асырылып келеді. Бүгінде мектептерде 8 362 психолог, 4 268 әлеуметтік педагог, 2 177 полиция инспекторы қызмет етеді.
Денсаулық сақтау министрлігінің мәліметіне сүйенсек, елімізде ана өлімінің деңгейі 2017 жылы 1,5 процентке, балалар өлімі 7 процентке төмендеді. Өңірлерде 60 үкіметтік емес ұйымдардың қатысуымен отбасын жоспарлау, ана мен бала денсаулығын қорғау бойынша 112 әлеуметтік жоба іске асырылды. Бес жасқа дейінгі балаларға патронаждық профилактикалық бақылау жүргізіліп, 600-ден астам балалар денсаулығы бөлмелері ұйымдастырылды. Жастар денсаулықты сақтау мәселелері бойынша консультациялық, заң және медициналық-психологиялық көмек көрсетіледі.
Отырыс соңында Г.Әбдіқалықова мемлекеттік органдарға бірқатар нақты тапсырмалар берді.
Абай АСАНКЕЛДІҰЛЫ, «Егемен Қазақстан»