Кеше Бас прокурор Асхат Дауылбаевтың төрағалық етуімен ағымдағы жылдың жұмыс қорытындыларын және алдағы кезеңдегі қызметтің басым бағыттарын қарап, талқылаған Бас прокуратураның кеңейтілген алқа мәжілісі болды. Оның жұмысына бейнеконференциялық байланыс арқылы облыс прокурорлары және оларға теңестірілген прокурорлар, облыстық, қалалық және аудандық деңгейдегі прокуратуралардың қызметкерлері қатысты.
Бас прокурор атап өткендей, ағымдағы жылы прокуратура органдары прокуратураның құқық қорғаушылық рөлін күшейтуге және тиімділігін одан әрі арттыруға бағытталған Мемлекет басшысының тапсырмаларын жүзеге асыру бағытында жұмыс істеді. Осы мақсаттарда зейнетақымен қамтамасыз ету, еңбек қатынастары және әлеуметтік қорғау, білім және ғылым, бәсекелестікті дамыту, индустрия және сауда мәселелері бойынша, сондай-ақ өзге де маңызды салаларда тексерулер жүргізілді. Тексерулер нәтижелері бойынша 380 мың заңдылықты бұзушылық жойылды. 500 мыңға жуық адамның конституциялық құқықтары қалпына келтірілді. 44 мың заңсыз құқықтық актілердің күші жойылды. 40 млрд. теңге шығынның 27 миллиарды бюджетке қайтарылды.
Азаматтардың еңбек ққұқықтарын қамтамасыз ету саласындағы мақсатты жұмыс басым бағыттардың бірі болып қала береді. Прокурорлық ықпал ету шаралары бойынша 155 мың жұмысшының жалпы сомасы 8,7 млрд. теңгені құрайтын мерзімінен кешіктірілген жалақылары төленді, бұл қарыз көлемін екі есеге азайтуға мүмкіндік берді.
Мемлекет басшысының құқық қорғау қызметінің тиімділігін арттыруға бағытталған жаңа талаптарына сай қылмыстық құқық саласында қылмыстарды жасыру проблемаларын шешу бойынша көп жұмыс атқарылды. Көзделген шаралар қылмыстылықтың шынайы көрінісін қамтамасыз етуге және зардап шеккендердің құқықтарына кепілдік алуға мүмкіндік береді. Осы шаралар нәтижесінде бизнестің іс-әрекетіне әкімшілік кедергі келтіретін бірқатар проблемалар шешілді, ауылшаруашылық өнімдерін импорттау үшін едәуір кедергі болып келген заң нормалары қайта қаралды.
Алқа жұмысының қорытындысы бойынша Бас прокурор азаматтардың, кәмелетке жасы толмағандардың конституциялық құқықтарын қамтамасыз ету, кәсіпкерлікті қорғау, ұйымдасқан қылмыспен, сыбайлас жемқорлықпен, экстремизм және терроризммен күрес тәрізді прокурорлық қадағалаудың басым бағыттары бойынша бірқатар тапсырмалар берді, деп хабарлады Бас прокуратураның баспасөз қызметі.