Парламент Сенатының депутаттары Бірғаным Әйтімова, Ерболат Мұқаев және Нариман Төреғалиев Елбасы Жолдауын өңір тұрғындарымен талқылау мақсатымен Батыс Қазақстан облысына келді.
Сенаторлар Орал қаласындағы бірқатар нысанды аралап, апатты үйлердің орнына мемлекет-жекеменшік әріптестігі аясында салынып жатқан жаңа үйлердің құрылысымен танысты. Апатты үйдің бірі – Гагарин көшесіндегі 12 пәтерлік екі қабатты көне ғимарат еді. Бүгінде ол жерде тоғыз қабатты 126 пәтерлік үй салынып жатыр. Ескі үйдің тұрғындары жаңа үйге көшіріліп, қалған пәтерлер «7-20-25» бағдарламасы бойынша берілетін болады. Құрылыстың жай-жапсарымен танысқан Бірғаным Әйтімова тұрғын үйдегі коммуналдық шаруашылық жұмыстарын жүргізудегі мәселелер қалай шешілетінін сұрады. Сауалға жауап берген қала әкімі Мұрат Мұқаев бұл үйге тұрғындар мен пәтер иелері кооперативінің өзара байланысын жақсартып, ПИК-тер жұмысының ашықтығын қамтамасыз еуге бағытталған «е-ПИК» жүйесі енгізілетінін айтты.
Бұдан соң депутаттар Құрманғазы көшесіндегі №198 көп қабатты тұрғын үй құрылысымен де танысты. Апатты үй орнына салынып жатқан бұл үйдің пәтерлері «7-20-25» бағдарламасына қатысушыларға берілмек.
Қазбек ҚҰТТЫМҰРАТҰЛЫ,
«Егемен Қазақстан»
Батыс Қазақстан облысы